विराटचोकः सुन्दरहरैंचा सांस्कृतिक परिवार विराटचोकले आयोजना गरेको पहिलो सुन्दरहरैंचा आइडलमा पहिलो चरणबाट छानिएका ९८ जना आज दोस्रो चरणको लागि प्रतिष्पर्धा गरिरहेका छन् ।
आयोजकका अनुसार गत शुक्रबार जुपिटर इङ्लिस स्कुल गछियामा भएको पहिलो अडिसनबाट ५१ जना छानिएका थिए । शनिबार सिद्धार्थ इङ्लिस स्कुल खोर्सानेमा भएको अडिसनबाट छानिएका ४७ जना प्रतिष्पर्धी छानिएका थिए ।
छानिएका तिनै प्रतिष्पर्धी आज प्रतिष्पर्धामा उत्रिएका हुन् । आजको प्रतियोगिताबाट ४० जना प्रतिष्पर्धी सेमीफाइनलमा पुग्ने छन् । सङ्गीतकारहरू भीम बस्नेत, शेखर मगर र गोकुल न्यौपानेले आजको अडिसनमा सहभागी हुने प्रतियोगीको गायन क्षमताको जाँच गरिरहेका छन् ।
आयोजक संस्थाका अध्यक्ष आनन्द बस्नेतका अनुसार लुकेर रहेका सुन्दरहरैंचाका प्रतिभालाई उजागर गर्न सुन्दरहरैंचा आइडलको आयोजना गरिएको हो । प्रतियोगिता फाइनल भने असोज ११ गते हुने बताइएको छ ।