उर्लाबारी हत्या प्रकरणः यस्तो छ प्रवीण बास्तोलाको मृत्युको फेहरिस्त

  • फाल्गुन १२, २०७७
  • ५१६७६ पटक पढिएको
  • शंकर खत्री
alt

इटहरीः मोरङको उर्लाबारी नगरपालिका वडा नम्बर ५ का प्रवीण बास्तोला गत पौष ३ गते शनिबारका दिन अरु दिनजस्तै बिहानै उठेर आफ्नो काम गर्न तल्लिन देखिन्थे ।

पेसाले बस चालक उनी शनिबार भने बिदा बस्ने गर्थे । शनिबार भएकाले उनी नुहाइधुवाइमा व्यस्त थिए । त्योसँगै उनले चढ्ने स्कुटर पनि सफा गरेका थिए । सबैसँग मिजासिलो भएकै कारण उनले छिमेकी भाउजूहरुलाई ‘सबै सफा गर्दा त कस्तो राम्रो देखिदो रहेछ है’ भन्दै जिस्किए । सबै काम सकेर प्रवीण दिउँसोको साढे २ बजेतिर घरबाट निस्किए । घरबाट निस्कँदै गर्दा उनले आफ्नी आमालाई ‘मलाई मासु खान मन लागेको छ भरे मासु ल्याएर पकाउनु है’ भनेका थिए । त्यसपछि उनी साथीको घरमा गएको बताइएको छ । करीब ४ बजेतिर साथीको घर पुगेको र त्यहाँ मदिरा सेवन गर्दै बसेको बताइएको छ । त्यही समयबाट प्रवीण घर फर्किनन् । बेलुका अबेरसम्म र भोलिपल्ट बिहानसम्म पनि छोरा घर नआउनुको साथै सम्पर्कविहीन भएपछि परिवारले उनको खोजी गरेको थियो । त्यत्तिकैमा ४ गते आइतबार प्रवीणका बुबा प्रेमप्रसाद बास्तोलाको मोबाइलमा दुर्गा तामाङ्ले फोन गरेर प्रवीणको मृत्यु भएको भन्दै जानकारी गराएका थिए ।

मृत्यु भए पनि कुन अस्पतलामा उनको शव राखिएको छ भन्ने परिवारलाई थाहा नै भएन । उर्लाबारीमा रहेको अरनिको अस्पतालभन्दा झण्डै २०० मिटर भित्र प्रवीणको घर रहेको छ । परिवारले आफ्नो छोरा त्यही अस्पतालमा हुनसक्ने आशाका साथ अस्पताल पुगे । तर, त्यहाँ पुग्दा उनीहरुले प्रवीणको शव पाउन सकेनन् । त्यसपछि उनीहरु विभिन्न अस्पताल हुँदै गोदावरी अस्पतालमा पुगेका थिए । अस्पतालमा पुग्दा एक स्वास्थ्यकर्मीले ‘उ त्यहाँ छ तपाईँको छोरा’ भन्दै प्रवीणका बाबुआमालाई देखाइदिए । दिउँसो भरे मासु पकाउनु है खान मन छ भनेर हाँस्दै हिँडेको छोरो भोलिपल्ट मृत अवस्थामा भेट्दा परिवारको होस नै उड्यो । त्यहाँ प्रवीणको शव एक सेतो कपडाले ढाकेर राखिएको थियो । उनकी आमाले त्यो कपडा उठाएर हेर्दा आफ्नो छोराको मृत्यु भएर ४÷५ घण्टादेखि त्यहाँ राखिएको थाहा पाइन् । एक आमाले आफ्नो छोरा मृत देख्दा कस्तो होला ? हामीले कल्पना पनि गर्न नसक्ने कुरा प्रवीणकी आमाले भोगिन् । छोरा त्यो अवस्थामा भेट्दा बास्तोला परिवारले यो मृत्यु नभई हत्या हुन सक्ने आशंका गरे । प्रवीणको दाहसँस्कारसँगै बास्तोला परिवारले प्रवीणको हत्या भएको भन्दै इलाका प्रहरी कार्यालय उर्लाबारीमा पुस ९ गते जाहेरी दिए । ३१ वर्षीय प्रवीणको हत्या भएको भन्दै बुबा प्रेमप्रसादले जाहेरी दर्ता गराएपछि उर्लाबारी प्रहरीले हत्यामा संलग्न भएको आरोपमा ३१ वर्षीय राजेश राणपहेलीसहित ६ जनालाई पक्राउ गर्यो ।

त्यसअघि प्रहरीले गोदावरी अस्पतालमा मृत्यु भएका प्रवीण कोठामा अचेत अवस्थामा फेला परेको र उनलाई गोदावरी अस्पतालमा पुर्याउनासाथ डाक्टरले मृत्यु भएको पुष्टि गरेको जनाएको छ । त्यो घटनाबारे थाहा पाएपछि इलाका प्रहरी कार्यालय उर्लाबारीबाट गएको प्रहरीले प्रवीणको साथीको घरमा गएर मुचुल्का उठाएको थियो । त्यसपछि प्रहरीले प्रवीणको शवलाई पोस्टमार्टमको लागि सुनसरीको धरानस्थित बीपी कोइराला स्वास्थ्य विज्ञान प्रतिष्ठान पठायो । पोस्टमार्टमका क्रममा प्रवीणको शरीरको कुनै पनि भागमा चोट नलागेको र कोठामा निसास्सिएर उनको मृत्यु भएको भन्ने रिपोर्ट आयो । उनी विष खाएर वा खुवाइएर मरेको हुनसक्ने भन्दै भिसेरा परीक्षण गर्दा पनि त्यस्तो केही देखिएन । इलाका प्रहरी कार्यालय उर्लाबारीमा दर्ता भएको ‘ज्यानसम्बन्धी कसुर’ मुद्दा प्रहरीले अनुसन्धान गरेर जिल्ला सरकारी वकिलको कार्यालयमा पठायो । माघ २ गते सरकारी वकिल कार्यालय मोरङले मुद्दा नचलाउने निर्णय गर्दै ६ जना आरोपीलाई ‘जिम्मा जमानी’मा छोड्न प्रहरीलाई निर्देशन दियो । प्रहरीको अनुसन्धान प्रतिवेदनमा मृत्युको कारण यकिन नखुलेको र आरोपीहरुले इन्कार गरेकाले ‘मुद्दा बचाउन’ थप अनुसन्धान गर्नेगरी मिसिल फिर्ता पठाइएको सरकारी वकिल कार्यालयले जानकारी दियो ।

सरकारी वकिलले हतारमा मुद्दा चलाउँदा मुद्दा कमजोर हुने रायसहित ‘आरोपीलाई हिरासतबाहिर राखेर अनुसन्धान गर्नू’ भन्ने निर्देशन दिएपछि उर्लाबारी प्रहरीले अरोपीहरुलाई छोडेको थियो । आफ्ना दाजुको मृत्यु भएको दुई महिना बितिसक्दा पनि प्रहरीले घटनामा संलग्न भएकाहरुको विषयमा केही नगरेको भन्दै इलाका प्रहरी कार्यालयमा मिसिल हेर्न पुगिन् प्रवीणकी बहिनी सदिक्षा बास्तोला । उनी अध्ययनको सिलसिलामा अमेरिकामा बस्दै आएकी थिइन् । इलाका प्रहरी कार्यालय उर्लाबारीमा गएर दाजुको मुद्दासम्बन्धी मिसिल फायल हेर्दा सदिक्षा चकित परिन् । उनले दाइको मिसिल फायलमा एउटा तस्बिर पनि देखिन् जुन उनको दाइसँग कतै पनि सम्बन्धित थिएन ।

प्रवीणको मिसिल फायलमा एक ‘फोटो सप’बाट ‘एडिट’ गरिएको तस्बिर सदिक्षाले फेला पारिन् । आफ्नो दाइको मिसिलमा अर्काको फोटो देखेपछि उनले प्रहरी निरीक्षक उद्धव पोखरेललाई त्यसबारे सोधिन् । सुरुमा त, पोखरेलले आफ्नै दाइको फोटो पनि नचिन्ने भन्दै सदिक्षालाई गाली गरे । सदिक्षा र उनका परिवारले त्यो तस्बिर प्रवीणको नभएको जिकिर गरेपछि पोखरेल मिसिल फायल बन्द गर्दै फायल बोकेर त्यहाँबाट हिँड्छन् । प्रहरी प्रशासनमा भएको यो लापरबाहीलाई सदिक्षाले हेर्न सकिनन् र उनले आफ्नो सामाजिक सञ्जाल प्रयोग गरेर घटनाबारे लाइभ जानकारी गराइन् । त्यही फेसबुक लाइभबाट यो घटना एकाएक चर्चामा आउन थाल्यो ।

नियामक निकायको चासो
अहिले यो घटनाका सम्बन्धमा सम्पूर्ण निकायले चासो देखाउन थालेका छन् । स्वयम् प्रहरी कार्यालय मात्र नभएर अदालतले पनि घटनाबारे चासो दिएको हो । यो घटनाबारे अहिले सामाजिक सञ्जाल, सञ्चार माध्यमहरु, प्रहरी तथा अदालतमा बहस तथा टिकाटिप्पणी भइरहेको छ । घटनाबारे निश्पक्ष छानबिन नभएको भन्दै परिवार तथा आफन्तहरुले १० गते सोमबार इलाका प्रहरी कार्यालय उर्लाबारीमा धर्ना दिएका थिए । त्यसपछि हिजो अर्थात् मंगलबार परिवार तथा आफन्तहरु जिल्ला सरकारी वकिलको कार्यालय विराटनगर गएका थिए । घटनाबारे आफूहरु अनभिज्ञ रहेको र आफूहरुलाई घटनाबारे जानकारी गराएकोमा सरकारी वकिल कार्यालयले सहयोग गर्ने वचनबद्धता दिएको सदिक्षाले बताइन् ।

प्रतिक्रिया दिनुहोस

विमानस्थल र उपत्यका ट्राफिक प्रहरी डीआईजीको कमाण्डमा

इटहरीः सरकारले त्रिभुवन अन्तर्राष्ट्रिय विमानस्थल, नेपाल प्रहरी शिक्षालय भरतपुर र उपत्यका ट्राफ ...

विजय श्रेष्ठ बने सुनसरी उद्योग वाणिज्य संघका नयाँ अध्यक्ष

धरानः उद्योग वाणिज्य संघ सुनसरीको निर्वाचन सम्पन्न भएको छ । धरानमा सम्पन्न निर्वाचनबाट नेपाली कांग्र ...

उपभोक्ता ठगीको आरोपमा नौ ओटा पसलमाथि कारबााही

पर्साः वीरगञ्जस्थित वाणिज्य, आपूर्ति तथा उपभोक्ता संरक्षण कार्यालयले बारा कलैयाका विभिन्न नौ पसललाई ...

इष्ट टुरिजम इभेन्ट म्यानेजमेन्ट एण्ड मिडिया प्रालिद्धारा प्रकाशित

प्रदेश पोर्टल डटकम

इटहरी उपमहानगरपालिका, सुनसरी, कोशी, नेपाल

  • कम्पनी दर्ता नं. १९४७९७/०७५/०७६
  • स्थायी लेखा नं. ६०६६४३६५८
  • सूचना विभाग दर्ता नं. ९३०/०७५–०७६
  • प्रेस काउन्सिल दर्ता नं. १७१/०७५–०७६
  • फोन नं.: +९७७ २५ ५८२६९०
  • मोबाइल नं.: +९७७ ९८४२०३७४०२
  • इमेल: pradeshportal@gmail.com
 
 
  • प्रबन्ध सम्पादकः प्रेमप्रसाद बास्तोला
  • प्रबन्धक :शुसिला उप्रेती
  • कार्यकारी सम्पादक :प्रकाश बञ्जरा
  • सह सम्पादक :शिशिर भट्टराई
  • प्रमुख संवाददाता :सुबिन बिश्वकर्मा
  • मार्केटिङ प्रमुख :देवराज पुरी
 

Copyright © 2018 / 2022 - Pradeshportal.com All rights reserved