चक्र बास्तोलाः गुटभन्दा माथि र व्यवहारिक राजनीतिज्ञ

  • आश्विन २८, २०७५
  • १९३५ पटक पढिएको
  • विष्णुु भुर्तेल
alt

चक्र बास्तोला थिए कोइरालाहरूका विश्वासपात्र । बीपी कोइरालाले धेरै महत्वपूर्ण, च्यालेन्जिङ जिम्मेवारी दिएर पठाउँदा पनि काम फत्ते गरेर आउने । बीपीले भनेका थिए सुशील र चक्रमा क्रान्ति सफल पार्ने र पार्टी हाँक्ने सम्भावना छ ।
बीपीले पत्याएका चक्र बास्तोलालाई गिरिजाप्रसादले पनि राम्रै गरी पत्याउँथे । कुरा २०५६ को आमचुनाव अघिको हो । चक्रप्रसादलाई फोन गरेर बिहानै भेट्न डाकेछन् गिरिजाप्रसादले । बोलाएको समयभन्दा आधा घण्टा ढिलो चक्र बास्तोला पुगेछन् । गिरिजाप्रसाद बाहिर निस्कन लाग्दै थिए, बास्तोला ठिक्क पुगे ।
गिरिजाप्रसादले भने, ‘यार, चक्रजी चुनाव त जित्नुपर्छ । कसरी जित्ने आइडिया सोच्नुस न ।’
‘के चुनाव जित्ने खोइ ? जनताले दिएको बहुमत आफँैले ढालेर मध्यावधि गराउनुभयो । त्यसपछि ६÷६ महिनामा सरकार बने । यो व्यवस्थाप्रति अनि हाम्रो पार्टीप्रति जनताको विश्वास बढेको देख्दिनँ,’ चक्र बास्तोलाको जवाफ थियो ।
अनपेक्षित जवाफ पाएपछि गिरिजाप्रसाद चकित भए र फेरि भने, ‘अब के गर्ने त ?’
चक्रको जवाफ थियो ‘विगतका केही त्रुटिहरू सच्याउने ।’
‘त्यो भनेको के हो ?’
पार्टी सभापति तपाईं हुनुहुन्छ तर यतिबेला तपाईं धेरै आलोचित पनि हुनुहुन्छ । विपक्षीले गिरिजाप्रसादले बहुमत थेग्न सक्दैन भन्छन् । भावी प्रधानमन्त्रीको रुपमा किसुनजीलाई घोषणा गरेर जाऔं । किसुनजी पार्टी संस्थापक पनि, एउटा सेन्टिमेन्ट पनि बढ्छ ।’
‘किसुनजी भेट्न र कुरा गर्न मान्छन् त ?’
‘एकपटक प्रयत्न गरौं त म ?’
‘ओके गर्नुस् ।’
चुनाव गराउने सरकारका प्रधानमन्त्री थिए गिरिजाप्रसाद । माओवादी द्वन्द्वको बेला थियो र दरबारले शाही सेनाको सूचना भन्दै चुनाव हुन नसक्ने भनेर चुनाव रोक्न खोज्दै थियो । यतिसम्म कि चुनावी प्रयोजनार्थ सुरक्षाका लागि हेलिकप्टर किन्न पनि दरबारले रोकेपछि प्रहरी प्रमुख अच्युतकृष्ण खरेलले हेलिकप्टर भाडामा लिन सुझाए । पछि प्रधानमन्त्री गिरिजाप्रसादले २ करोड रुपैयाँ मन्त्रिपरिषद्बाट पारित गराएका थिए ।
गिरिजाप्रसादसँगको कुराकानीपछि बास्तोलाले सल्लाह गरे पार्टी महामन्त्रीद्वय तारानाथ रानाभाट र बासु रिसालसँग । गिरिजाप्रसाद र किसुनजीलाई भेटका लागि वातावरण बनाउनु थियो । पटक– पटक कुरा गर्दा पनि किसुनजी गिरिजाप्रसादसँग भेट गरेर कुरा गर्नै नमान्ने । पार्टी कार्यालयको ढोकै छेउमा महामन्त्री रानाभाटले क्वाँक्वाँ रुँदै किसुनजीलाई भनेछन् ‘हामी चैँ तपाईहरूलाई हेरेर राजनीति गर्ने, तपाईंहरू चँै एकापसमा संवाद नै गर्न नमान्ने ? अनि कसरी चल्छ पार्टी ?
किसुनजीले भनेछन्, ‘मलाई गिरिजाबाबुको विश्वास लाग्दैन ।’
‘के गर्दा विश्वास लाग्छ त ?’
‘एक्लै त जे पनि भन्छन्, त्यो पालना गर्दैनन् । साथीभाइले सुन्नेगरी सबैलाई साक्षी राखेर गिरिजाबाबुले कमिटमेण्ट गर्नुपर्छ ।’
‘ल, हामी त्यो वातावरण बनाउँछौं ।’
रानाभाट र बास्तोलाले फेरि सल्लाह गरे र किसुनजीले भेटेर कुरा गर्न मानेको कुरा भन्न बास्तोला गए प्रधानमन्त्री गिरिजाप्रसादसँग । गिरिजाप्रसादले किसुनजीसँगको भेटको लागि समय र ठाउँ मिलाउन एकपटक आफैं किसुनजीसँग भेटेर आउन बास्तोलालाई भने । बास्तोला किसुनजीलाई भेट्न जाँदा फेरि किसुनजीले अर्काे अड्को थापे, ‘साथीभाइ सबैको सामु किसुनजी भावी प्रधानमन्त्री भने पनि पछि बन्न नदिए को ग्यारेन्टी बस्छ ?’
बास्तोलाले म बस्छु । सबै साथीभाइ बस्छन् भनेछन् ।
फेरि किसुनजीले भने, ‘आरे यार बास्तोलाजी, त्यसो भनेर कहाँ हुन्छ ? लु गिरिजाबाबुले चुनाव लड्नु हुँदैन भने म पत्याउँछु । गिरिजाबाबुलाई चुनाव नलड्न राजी गराउनुस् ।’
पार्टी सभापति चुनाव नलड्ने ? यसको सन्देश कस्तो जान्छ ? के निहुँ खोज्ने कुरा मात्र गर्नुहुन्छ किसुनजी ? तपाईँहरू मिल्दामात्र पार्टी, प्रजातन्त्र र देशको भविष्य राम्रो हुन्छ । एकअर्काप्रतिको निषेधको राजनीति नसोच्नुस् । हामी सबै तपाईंलाई प्रधानमन्त्री बनाउन लागि परेका छौ । तपाईं जहिल्यै शङ्का गरेर मात्र बस्ने ?’
‘उसो भए अलिक शान्त ठाउँमा भेटघाट गराउनुस् ।’ किसुनजीले रसिलो पारामा भनेछन् ।
चक्र बास्तोलाले फोन गरे गोदावरी भिलेज रिसोर्टका उनका पुराना मित्र श्रीधर जोशीलाई । गिरिजाप्रसाद र किसुनजीको भेट त्यही रिसोर्टमा भयो । बास्तोलाले भावी प्रमको रूपमा अघिल्लै दिन आश्वास्त पारेपछि किसुनजीले साक्षीको रूपमा अन्य कोही राखेनन् । साक्षी बस्न गएका दुई महामन्त्री, डा. रामशरण महत, चक्र बास्तोला, महेश आचार्यहरू बाहिरै बसे । के कुरा भयो थाहा भएन । साक्षीहरूले भने, ‘दुई बुढाहरू बसेर केके सल्लाह गरे । केही थाहा भएन, यतिमात्र थाहा पायौं कि उनीहरूले १÷१ बोतल बियर चाहिँ खाएछन् ।’
लगत्तैको संसदीय दलको बैठकमा किसुनजी भावी प्रम भनेर गिरिजाबाबुले प्रस्ताव गरे । बैशाख २० र जेठ ३ मा दुई चरणमा चुनाव सम्पन्न भयो । काङ्ग्रेसले स्पष्ट बहुमत पायो । किसुनजी पर्साबाट प्रतिनिधि सभामा निर्वाचित भए र पहिलो पटक जननिर्वाचित प्रधानमन्त्री बने । ६ महिनामै किसुनजीको सरकार ढल्यो । त्यसबखत पनि चक्र बास्तोलाले सरकार टिकाउन अनेक प्रयत्न गरे । बहुमत सदस्यले संसदीय दलभित्र अविश्वास प्रस्ताव राखे ।
खुमबहादुर, गोविन्दराज जोशी लगायत झण्डै दर्जन मन्त्री पनि राजीनामा गरेर हिंँडे । त्यसबखत गिरिजाप्रसादलाई भेटेर चक्र बास्तोलाले ‘यो काम नगरौं, यसले फाइदा कसैलाई गर्दैन, यो काममा म तपाइलाई साथ दिन सक्दिनँ’ भनेर सम्झाउने प्रयत्न पनि गरे । सँगै रहेकी नोना कोइरालाले भनिन् ‘चक्रजी तपाईं गिरिजाबाबुलाई भोट पनि हाल्नुहुन्न त ?’
‘भोट हाल्ने, नहाल्ने त्यो पछिको कुरा हो । जे गर्न खोजिँदैछ त्यो ठीक छैन ।’
किसुनजीको सरकार ढालिहाल्ने पक्षमा शैलजा आचार्य थिइनन् । नोना कोइराला पनि तत्काल सरकार ढाल्दा घाटा हुने निष्कर्षमा थिइन् भन्ने सुनिन्छ । २०४७ को संविधानमा आफ्ना अधिकार खुम्च्याइएको भनेर दरबार किसुनजीलाई जुनसुकै हालतमा पनि प्रम बन्न नदिने दाउमा थियो भनेर पनि भनिन्छ । किसुनजीले माओवादीसँग वार्ताका लागि अनौपचारिक लबिङ गरिरहेका थिए र सरकार ढालियो पनि भनिन्छ ।
जे होस् इतिहासले अनुसन्धानका लागि छोडेको यो अर्को विषय हो । त्यही ठाउँबाट काङ्ग्रेसको टाउकोमा अर्को रोग थपियो, ‘काङ्ग्रेसले बहुमतको सरकार आफैंले टिकाउन सक्दैन भन्ने’, अलबिदा चक्र दाइ ।

प्रतिक्रिया दिनुहोस

महिला सञ्जालका गतिविधि गाउँगाउँमा पुर्याउन इटहरीकी उपमेयर संगीता चौधरीको आग्रह

इटहरीः इटहरी उपमहानगरपालिकाकी नव निर्वाचित उपमेयर संगीता कुमारी चौधरीले महिला संजालका गतिविधी गाउँगा ...

खेलाडीको विवरण संकलन गर्दै प्रदेश खेलकुद विकास बोर्ड

इटहरीः प्रदेश नम्बर एक सरकारको सामाजिक विकास मन्त्रालय अन्तर्गत रहेको प्रदेश खेलकुद विकास बोर्डले प् ...

गरिमा बैंकको वित्तीय साक्षरता कार्यक्रम इटहरीमा सम्पन्न, एक सय तीस बढीलाई बैंकिङ्ग शिक्षा

इटहरीः नेपाल राष्ट्र बैकबाट ‘ख’ बर्गको वित्तीय कारोबार गर्न इजाजत पाएको गरिमा विकास बैँक ...

इष्ट टुरिजम इभेन्ट म्यानेजमेन्ट एण्ड मिडिया प्रालिद्धारा प्रकाशित

प्रदेश पोर्टल डटकम

इटहरी उपमहानगरपालिका, सुनसरी, कोशी, नेपाल

  • कम्पनी दर्ता नं. १९४७९७/०७५/०७६
  • स्थायी लेखा नं. ६०६६४३६५८
  • सूचना विभाग दर्ता नं. ९३०/०७५–०७६
  • प्रेस काउन्सिल दर्ता नं. १७१/०७५–०७६
  • फोन नं.: +९७७ २५ ५८२६९०
  • मोबाइल नं.: +९७७ ९८४२०३७४०२
  • इमेल: pradeshportal@gmail.com
 
 
  • प्रबन्ध सम्पादकः प्रेमप्रसाद बास्तोला
  • प्रबन्धक :शुसिला उप्रेती
  • कार्यकारी सम्पादक :प्रकाश बञ्जरा
  • सह सम्पादक :शिशिर भट्टराई
  • प्रमुख संवाददाता :सुबिन बिश्वकर्मा
  • मार्केटिङ प्रमुख :देवराज पुरी
 

Copyright © 2018 / 2022 - Pradeshportal.com All rights reserved