दुहबी: सुनसरीको दुहबीमा जारी नगरस्तरीय प्रथम मेयर कप फुटबल प्रतियोगिताको आइतबार भएको अन्तिम प्रि–क्वाटर फाइनलबाट वडा नम्बर ६ क्वाटर फाइनलमा प्रवेश गरेको छ ।
विजयी वडाले वडा नम्बर १२ लाई टाइब्रेकरमा ४–२ गोल अन्तरले पाखा लगाएको हो । खेलको पहिलो हाफको ३३ औं मिनेटमा दुहबी–१२ का मनिष चौधरीले १ गोल गर्दै आफ्नो टिमलाई १–० ले अग्रता दिलाएका थिए । खेलको दोस्रो हाफको ४४ औं मिनेटमा दुहबी – ६ का सूर्य थापाले १ गोल गर्दै आफ्नो टिमलाई बरबरीमा पुर्याएका थिए ।
खेलको निर्धारित समयसम्म दुवै टिमबाट थप गोल नभएकाले खेलको निर्णय लिन टाइब्रेकरको सहारा लिइएको थियो । आजको खेलमा उत्कृष्ट खेलाडीको उपाधि वडा नम्बर ६ का अजय गोश्वामीले पाए । उपाधिसँगै उनले नगद १ हजारसहित मेडल प्राप्त गरेका थिए । सोमबार पहिलो क्वाटर फाइनल खेल वडा नम्बर २ र ३ बीच हुने आयोजकले जनाएको छ ।
_1720278409.jpg)
