वराहक्षेत्रः वराहक्षेत्र प्याब्सनको आयोजनामा भएको अन्तर विद्यालयस्तरीय फुटबल प्रतियोगिताको दोस्रो दिनको खेलमा चिल्ड्रेन हार्ट एकेडेमी राजावास र वराह राइजिङ स्टार चतरा विजयी भएका छन् ।

आधारभूत विद्यालयतर्फ चिल्ड्रेन हार्ट एकेडेमी राजावासले २–० को अग्रतामा पिसफुल इङ्लिस स्कुललाई पराजित गरेको हो ।
चिल्ड्रेन हार्ट एकेडेमीका खेलाडी समीर शेर्पालाई डि एरियाभित्र विपक्षी टिमले लडाएपछि पाएको पेनाल्टीको सदुपयोग गर्दै निकेश मगरले आफ्नो टिमको लागि खाता खोलेका थिए ।

यता, माध्यमिक विद्यालयस्तरीय खेलमा वराह राइजिङ स्टार इङ्लिस स्कुल वराहक्षेत्र र भरौल बालमन्दिरबीच भएको खेलमा वराह राइजिङ स्टार विजयी भएको हो । निर्धारित समयमा १–१ गोल भएपछि खेलको निर्णय टाइब्रेकरमार्फत् भएको थियो । टाइब्रेकरमा वराह राइजिङले ५ र भरौल बाल मन्दिरले ४ गोल गरेका थिए ।

आजको प्रतियोगितामा आधारभूत विद्यालयतर्फ सुनसरी स्टार र सप्तकोशी विद्या मन्दिरबीच प्रतिष्पर्धा हुनेछ । त्यस्तै, माध्यमिक विद्यालयस्तरीय प्रतियोगितामा मुनबिम एकेडेमी र जय सप्तकोशी एकेडेमी भिड्ने आयोजकले जनाएको छ ।