दुहबीः सुनसरीको दुहबीमा भइरहेको प्रथम मेयर कप फुटबल प्रतियोगिताको शनिबार भएको अन्तिम क्वाटर फाइनल खेलबाट दुहबीको वडा नम्बर ७ सेमीफाइनलमा प्रवेश गरेको छ ।

विजयी टिमले वडा नम्बर ६ लाई २–१ गोल अन्तरले पाखा लगाएको थियो । खेलको ८ औं मिनेटमा विजयी टिमका बोधनारायण माझीले १ गोल गर्दै आफ्नो टिमलाई १–० ले अग्रता दिलाएका थिए ।

खेलको ३० औं मिनेटमा वडा नम्बर ६ का अजय गोश्वामीले १ गोल गर्दै खेललाई बराबरी बनाएका थिए । अत्यन्तै प्रतिष्पर्धात्मक खेलमा मध्यान्तरपछिको ६५ औं मिनेटमा दुहबी वडा नम्बर ७ का सुरज माझीले १ गोल गरेपछि वडा नम्बर ७ सेमीफाइनलमा प्रवेश गरेको थियो ।

खेलको उत्कृष्ट खेलाडी दुहबी वडा नम्बर ७ का प्रेम पासवान घोषित भए । उनलाई खेलका प्रमुख अतिथि दुहबी वडा नम्बर ७ का वडाध्यक्ष विजय चौधरीले नगद १ हजार सहित मेडल प्रदान गरे । आइतबार हुने पहिलो सेमीफाइनल खेल दुहबीको वडा नम्बर २ र वडा नम्बर १० का बीचमा हुने आयोजकले जनाएको छ ।