दुहबीः सुनसरीको दुहबीमा जारी प्रथम मेयर कप फुटबल प्रतियोगिताको आइतबार भएको पहिलो सेमीफाइनल खेलमा दुहबी १० विजयी भएको छ ।

वडा नम्बर २ लाई टाइब्रेकरमा ३–० गोल अन्तरले पाखा लगाउँदै वडा नम्बर १० उपाधि नजिक फाइनलमा प्रवेश गरेको छ । खेलको मध्यान्तरअघि र मध्यान्तरपछि दुवै तर्फबाट अत्यन्तै प्रतिस्पर्धात्मक खेल भए पनि गोलरहित बराबरी भएको थियो । खेल बराबरी भएपछि टाइबे्रकरको सहारा लिइएको थियो ।

टाइब्रेकरमा दुहबी वडा नम्बर २ का खेलाडीहरू अञ्जु थापामगर, विवेक माझी र फुलन राई गोल गर्नबाट चुकेपछि दुहबी वडा नम्बर १० का खेलाडी कोमल विश्वास, ईश्वर भगत र कविन्द्रनारायण माझीले गोल गर्दै आफ्नो टिमलाई उपाधि नजिक फाइनलमा प्रवेश गराएको हो ।

खेलको उत्कृष्ट खेलाडी दुहबी वडा नम्बर १० का जर्सी नम्बर १२ प्रह्लादकुमार चौधरीलाई खेलका प्रमुख अतिथि दुहबी नगरपालिकाका प्रमुख प्रशासकीय अधिकृत खेमराज ओझाले नगद १ हजारसहित मेडल प्रदान गरेका थिए । सोमबार हुने दोस्रो सेमीफाइनल खेल दुहबी को वडा नम्बर ७ र वडा नम्बर ८ का बीच हुने आयोजकले जनाएको छ ।