दुहबीः सुनसरीको दुहबीमा जारी प्रथम मेयर कप फुटबल प्रतियोगिताको सोमबार भएको दोस्रो सेमीफाइनल खेलमा दुहबी वडा नम्बर ७ ले वडा नम्बर ८ लाई २–१ गोल अन्तरले पाखा लगाउँदै फाइनलमा प्रवेश गरेको छ ।

खेलको मध्यान्तर अघिको ९ औं मिनेटमा वडा नम्वर ७ का पारस चौधरीले १ गोल गरेका थिए । त्यसैगरी, मध्यान्तरअघिको १६ औं मिनेटमा दुहबी–७ का दिलीप चौधरीले १ गोल गर्दै आफ्नो टिमलाई उपाधि नजिक पुर्याएका थिए । मध्यान्तरपछि दुहबी–८ का सन्तोषकुमार चौधरीले १ गोल गरेका थिए । खेलको उत्कृष्ट खेलाडी वडा नम्बर ७ का धनकुमार खाँ थारुलाई खेलका प्रमुख अतिथि दुहबी नगरपालिकाका उपमेयर सुनिता दाहाल (साह)ले १ हजार रुपैयाँसहित मेडल प्रदान गरेकी थिइन् ।

बुधबार हुने फाइनल खेल दुहबीको वडा नम्बर ७ र १० का बीच हुने छ । मेयर कप फुटबल प्रतियोगितामा विजेता टिमले नगद ५१ हजार नगद, कप तथा मेडल र प्रमाणपत्र तथा उपविजेताले २५ हजार नगद, कप तथा मेडल र प्रमाणपत्र पाउने आयोजकले जनाएको छ ।