इटहरीः प्रदेश १ भरिका १४ वटै जिल्लाबीच भएको पुरुष भलिबल प्रतियोगितामा झापा, ओखलढुङ्गा, सोलुखुम्बु र संखुवासभा सेमिफाइनलमा प्रवेश गरेका छन् ।
शुक्रबार भएको खेलमा उदयपुरलाई सोझो सेटमा हराउँदै झापा सेमिफाइनलमा पुगेको हो । उदयपुरका खेलाडीले पहिलो सेटमा ११ र दोस्रो सेटमा २१ अंक मात्र ल्याउन सके भने ओखलढुङ्गा र खोटाङबीच भएको खेलमा ओखलढुङ्गाले खोटाङमाथि सोझो सेटमै जित हासिल गरेको थियो ।
खोटाङ पहिलो सेटमा १६ र दोस्रो सेटमा ११ अंकमा सीमित हुँदा ओखलढुङ्गालाई जित निकाल्न गाह्रो भएन । यता शुक्रबार नै भएको भोजपुर र सोलुखुम्बु बीचको खेलमा सोलुले जित हासिल गर्यो भने अर्को खेलमा तेह्रथुम र संखुवासभाबीच प्रतिस्पर्धा भएकोमा तेह्रथुमलाई पछि पार्दै संखुवासभा पनि पुरुष भलिबलको सेमिफाइनलमा प्रवेश गरेको छ ।
नवौँ राष्ट्रिय खेलकुद प्रतियोगिताको छनौटअन्तर्गत भएको प्रतिस्पर्धामा शनिबार बिहानैबाट सेमिफाइनल खेल सञ्चालन हुने र फाइनल पनि शनिबार नै हुने छनोट समितिले जानकारी दिएको छ ।
_1720278409.jpg)
