धरानः धरान ५ सिरान देउरालीमा रहेको युनिक पुल हाउस एण्ड खाजा घरको आयोजनामा आयोजित धरान स्नुकर च्याम्पियनको फाइनलमा आज गणेश गुरुङ्ग र बालकुमार मेन्याङ्गबो भिड्ने भएका छन् ।

बेस्ट अफ नाइनमा खेलाइएको सेमिफाइनल खेलमा गणेशले दोर्जे पाख्रिनलाई ५–१ र बालकुमारले सरोज राईलाई ५–१ कै अन्तरले पराजित गर्दै फाइनल प्रवेश गरेका हुन् । प्रतियोगिताका विजेताले नगद तीस हजार, ट्र्रफी र प्रमाणपत्र प्राप्त गर्नेछन । यसैगरी, उपविजेताले नगद २० हजार, ट्र्रफी र प्रमाणपत्र प्राप्त गर्नेछन् ।

व्यक्तिगत पुरस्कारतर्फ प्रतियोगिताको सेन्चुरी ब्रेक पुरस्कार नगद १५ हजार र हाइएस्ट ब्रेक पुरस्कार नगद १० हजार रुपैयाँ, ट्र्रफी र मेडल रहेको छ । फाइनल खेल आज दिउसो १२ः०० बजेदेखि सुरु हुनेछ । भदौ २३ गतेदेखि सुरु भएको प्रतियोगितामा धरानभरिका ५२ जना खेलाडीहरुले सहभागिता जनाएका थिए ।