इटहरीः धनुषाका दुई जना युवाको अपहरणगरी भारतमा हत्या गरिएको छ ।
जनकपुरधाम उपमहानगरपालिका–८ का २१ वर्षीय रोहित साह र वडा नं १३ का २२ वर्षीय विष्णु साहको अपहरण पछि हत्या गरिएको बताइएको छ ।
गत पुस २७ गतेदेखि बेपत्ता दुवै जना एउटै परिवारको भएको पुष्टी भएको छ । २१ बर्षीय रोहित साह बिष्णुलाई लिएर भारतको सीतामढी जिल्लाको बेला परिहार बस्ने एक नातेदारको घर गएका थिए । तर अपराधीहरुको फन्दामा परि उनिहरुको हत्या हुन गएको बुझिएको छ । गत सोमबार बिष्णुका परिवारलाई भारतीय नम्बरबाट अपहरणकारीले रु ५० लाख रकम माग गरेको तर बिष्णुको परिवार अपहरणकारीलाई रु २० लाख दिन सहमत भएको भएपनि उनिहरुको हत्या भएको प्रमाणित भएको छ ।
अपहरणकारीले रु २० लाख लिएर सर्लाहीको मलङ्गवा नजिक नेपाल–भारत सीमा क्षेत्रमा बोलाएका थिए । यसबारे बिष्णुको परिवारले प्रहरीलाई जानकारी गराएको थियो । तर भारतीय प्रहरीले दुई शव भेटेपछि आइतबार नेपाल प्रहरीको धनुषालाई खवर गरेको छ । परिवारले फिरौती मागिएको बारेमा भारतीय प्रहरीलाई जानकारी गराइएको जनाएका छन् ।
भारत बिहारको सीतामढीमा खाडलमा गाडिएको अवस्थामा दुवै जनाको शव फेला परेको बताइएको छ । हत्यामा संलग्न भएको आशङ्कामा भारतीय प्रहरीले तीन जनालाई पक्राउ गरेको छ । नेपाल प्रहरीले पनि अन्य दुई जनालाई पक्राउ गरेर अनुसन्धान अघि बढाएको धनुषा प्रहरीले बताएको छ ।
_1720278409.jpg)
