विराटनगरः प्रेस चौतारी नेपाल कोशी प्रदेशको दोस्रो प्रदेश अधिवेशनबाट अध्यक्षमा सुमन पुरी सर्वसम्मत चयन भएका छन् । बुधबार सम्पन्न अधिवेशनले पुरीलाई अध्यक्षमा सर्वसम्मत चयन गरेको हो ।
अधिवेशनले सर्वसम्मत रूपमै उपाध्यक्षमा युवराज विवश र महिला उपाध्यक्षमा ज्योति चौहानलाई चुनेको छ । त्यस्तै महासचिवमा बाबुराम भण्डारी र कोषाध्यक्षमा विशाल नेम्वाङ निर्वाचित भएका छन ।
प्रदेश कमिटीको सचिवमा रविन कट्टेल, दिनेश सुब्बा, भोला श्रेष्ठ, मञ्जु डाँगी, गणेश विष्ट र लक्ष्मी उप्रेती निर्वाचित भए । अधिवेशनमा आयोजक र प्रतिनिधि गरी १ सय ५६ जनाको सहभागिता रहेको थियो । प्रेस चौतारी नेपालका केन्द्रीय अध्यक्ष गणेश बस्नेतले उद्घाटन गरेको अधिवेशमा एमाले स्थायी कमिटी सदस्य तथा प्रचार तथा प्रकाशन विभाग प्रमुख राजेन्द्र गौतम, कोशी प्रदेश मुख्यमन्त्री हिक्मतकुमार कार्की, प्रेस चौतारी नेपालका उपाध्यक्ष गणेश पाण्डे, राजेश राई, महासचिव हिरामान लामा, नेताद्धय विश्वमणी सुवेदी,रामकुमार एलन लगायत सहभागी थिए ।
अधिवेशनले १३ बुँदे विराटनगर घोषणापत्र पनि जारी गरेको छ । जारी भएको घोषणपत्र यस्तो छः
१.मुलुकमा क्रियाशील सम्पूर्ण राजनीतिक शक्ति, तिनका भातृ संघ संगठन एवम् सामाजिक संघ संस्थाहरूलाई संविधान प्रदत्त प्रेस तथा अभिव्यक्ति स्वतन्त्रता रक्षाका लागि प्रतिबद्ध हुन अधिवेशन ध्यानाकर्षण गराउँदछ ।
२. नेपाल सरकारले राष्ट्रपतिबाट प्रमाणित गराई जारी गरेको सामाजिक सञ्जाल व्यवस्थापनसम्बन्धी अध्यादेशलाई चालु संसदमा पेश गरी व्यापक छलफल पछि ऐन बनाउन जोडदार माग गर्दछ ।
३.कोशी प्रदेश सरकारले बनाएको प्रदेशको आमसञ्चार सम्बन्धमा व्यवस्था गर्न बनेको विधेयक स्वागतयोग्य छ । प्रस्तावित विधेयकमाथि व्यापक छलफल गरी यसै अधिवेशनमा पारित गरी चालु आर्थिक वर्षबाटै कार्यान्वयनमा ल्याउन प्रदेश सरकारसमक्ष यो अधिवेशन आग्रह गर्दछ ।
४. सञ्चार संस्था, प्रतिष्ठान तथा पेसागत संगठनहरुमा महिला, दलित तथा सीमान्तकृत समूहको अर्थपूर्ण सहभागिताको लागि यो अधिवेशन माग गर्दछ ।
५. स्थानीय सरकारबाट प्रकाशनरप्रसारण गरिने विज्ञापनहरू प्रकाशनरप्रसारण गर्ने पहिलो हक सोही स्थानका सञ्चार माध्यमहरूले पाउनुपर्छ । यसको कार्यान्वयनका लागि सम्पूर्ण पालिकाहरूलाई यो अधिवेशन ध्यानाकर्षण गराउँदछ ।
६. अनलाइन न्युज पोर्टलहरूलाई पनि संघीय सरकारले उपलब्ध गराउने लोक कल्याणकारी विज्ञापन प्रदान गरेर स्थानीय मिडियाहरूलाई बचाउन यो अधिवेशन जोडदार माग गर्दछ ।
७. समृद्ध नेपाल सुखी नेपालीको राष्ट्रिय आकाङ्क्षा पूरा गर्ने अभियानमा सक्रियतापूर्वक क्रियाशील हुन सबै सञ्चारकर्मीहरूलाई आग्रह गर्दछ ।
८. पत्रकारहरूको भौतिक तथा पेसागत सुरक्षाका लागि तीनै तहका सरकार र यसका अङ्गहरूको ध्यानाकर्षण गराउँदछौँ ।
९. जिम्मेवार पत्रकार, जबाफदेही पत्रकारिताको मर्मलाई अङ्गीकार गर्न यस कोशी प्रदेशका सबै पत्रकारहरूमा ध्यानाकर्षणसहित आग्रह गर्दछौँ ।
१०. पछिल्लो समयमा आम सञ्चार माध्यममा प्रकाशित सामग्रीलाई लिएर पत्रकारविरुद्ध विद्युतीय अपराध (साइबर क्राइम)मा मुद्दा चलाउने सम्बन्धित निकायको दुराशायपूर्ण कदमप्रति यो अधिवेशनको गम्भीर ध्यानाकर्षण भएको छ ।
११. पछिल्लो समय कोशी प्रदेशभित्र देखिएका पहिचान सम्बद्ध आन्दोलनहरूलाई वार्ता र संवादको माध्यमबाट तत्काल समाधान गर्न संघीय तथा प्रदेश सरकारसमक्ष आग्रह गर्दछौँ ।
१२. आउँदो २०८२ साललाई कोशी प्रदेश सरकारले पर्यटन वर्ष मनाउन गरेको घोषणालाई सफल बनाउन यो अधिवेशन समर्थन गर्दछ ।
१३. विराटनगर महानगरको समृद्धिका लागि आवश्यक सहयोग गरिदिन संघीय सरकारसमक्ष यो अधिवेशन माग गर्दछ ।
