काठमाडौँः पूर्वराजा ज्ञानेन्द्र शाहलाई काठमाडौँ महानगरपालिकाले विभिन्न शीर्षकमा ७ लाख ९३ हजार जरिवाना गर्ने निर्णय गरेको छ । निर्णय अनुसार महानगरले शाहका नाममा ८ वटा पत्र नै काटेको छ ।
राजधानीको माइतीघरमा प्रदर्शन गरेका राजावादीले वातावरण प्रदूषण गरेको लगायतका शीर्षकमा महानगरले ७ लाख ९३ हजार जरिवाना गर्ने निर्णय गरेको हो।शुक्रबार भएको राजावादीहरुको आन्दोलनका क्रममा तीनकुने, कोटेश्वर लगायत क्षेत्रमा तोडफोड र आगजनी भएको थियो । महानगरले वातावरण तथा प्राकृतिक स्रोत संरक्षण ऐन २०७७ र काठमाडौँ महानगरपालिकाको आर्थिक ऐन बमोमिज जरिवाना गराएको हो ।
महानगरपालिकाले पूर्वराजा शाहलाई ८ वटा पत्र काटेको छ । पूर्वराजाको सहमतिमा शुक्रबार राजवादीले राजधानीको तीनकुने क्षेत्रमा प्रदर्शन गरेकामा फोहोरमैला गरेको लगायतका कारण देखाउँदै जरिवाना र क्षतिपूर्ति माग गर्दै पत्र काटेको हो ।
यस्तो छ महानगरले काटेको पत्रमा जरिवानाका शिर्षक
-कोटेश्वरको सडक तथा सडकपेटीमा जथाभावी फोहोर गरे वापत रु १ लाख जरिवाना ।
-महादेवस्थानको सडक तथा सडकपेटीमा जथाभावी फोहोर गरे वापत रु १ लाख जरिवाना ।
-तीनकुनेको सडक तथा सडकपेटीमा जथाभावी फोहोर गरे वापत रु १ लाख जरिवाना ।
-जडीबुटीको सडक तथा सडकपेटीमा जथाभावी फोहोर गरे वापत रु १ लाख जरिवाना ।
-बालकुमारीको सडक तथा सडकपेटीमा जथाभावी फोहोर गरे वापत रु १ लाख जरिवाना ।
-सिनामंगलको सडक तथा सडकपेटीमा जथाभावी फोहोर गरे वापत रु १ लाख जरिवाना ।
-दमकल तोडफोड गरे वापत रु १ लाख ३० हजार जरिवाना ।
-तीनकुनेमा रुख, बिरुवा, रेलिङ तोडफोड गरे वापत रु ६३ हजार जरिवाना ।
