इटहरीः उच्च माध्यमिक शिक्षा परिषद् हिसान सुनसरीले प्रत्येक वर्ष सञ्चालन गर्दै आएको स्पोर्टस मिट आइतबार शुरु भएको छ ।
आइतबार सम्पन्न छात्र भलिबलमा कोशी सेन्ट जेम्स माविले ग्रीनपिस माविलाई सोझो सेटमा पराजित गरेको छ ।
यस्तै, अर्को खेलमा डिपोट मावि नआएपछि पूर्वाञ्चल उच्च मावि धरानले वाकओभर पाएको छ ।
छात्रा भलिबलमा कोशी सेन्ट जेम्सले विश्व आदर्श माविलाई र समिट मावि धरानले नेशनल माविलाई सोझो सेटले पराजित गरेका हुन् ।
क्रिकेटको उद्घाटन खेलमा कोशी सेन्ट जेम्सले सुषमा गोदावारी माविलाई ३ विकेटले पराजित गरेको छ । दोस्रो खेलमा विश्व आदर्श माविले कस्तुरी माविलाई पराजित गरेको छ ।
विगत ७ वर्षदेखि निरन्तर आयोजना गरिँदै आएको स्पोर्टस मिटमा फुटबल, भलिबल, क्रिकेट, बास्केटबलका खेल समावेश गरिएको कार्यक्रम संयोजक एवम् हिसान सुनसरीका सदस्य सागर भट्टराईले बताए ।
_1720278409.jpg)
