इटहरीः तिहार तथा छठ पर्वलाई लक्षित गर्दै जिल्ला प्रशासन कार्यालय सुनसरीले देउसी–भैलो कार्यक्रम मर्यादित, व्यवस्थित र अनुशासित रूपमा सञ्चालन गर्न जिल्लावासीलाई आग्रह गरेको छ।
प्रमुख जिल्ला अधिकारी ईश्वरप्रसाद अर्यालले सूचना जारी गर्दै नेपाली मौलिक कला, संस्कृति र सामाजिक सद्भावको संरक्षण हुने गरी परम्परागत देउसी–भैलो कार्यक्रम सञ्चालन गर्न अनुरोध गरेका हुन्।
प्रशासनले देउसी–भैलो कार्यक्रम पूर्ण रूपमा स्वैच्छिक र मर्यादित ढङ्गले सञ्चालन गर्नुपर्ने स्पष्ट पारेको छ। कसैलाई पनि चन्दा वा दक्षिणा दिन बाध्य पार्न नपाइने सूचनामा उल्लेख छ।
त्यस्तै, विभिन्न जातजाति, धर्म, भाषा, लिङ्ग वा समुदायप्रति घृणा तथा द्वेष फैलाउने किसिमका अश्लील नृत्य, गीत तथा नारा प्रयोग गर्न निषेध गरिएको छ।
प्रशासनले चाडपर्व मनाउने क्रममा जुवा, तास नखेल्न, सार्वजनिक स्थानमा मदिरा सेवन गरी होहल्ला नगर्न तथा मादक पदार्थ सेवन गरेर सवारीसाधन नचलाउन पनि आग्रह गरेको छ।
त्यसैगरी, अत्यधिक ठूलो आवाजमा साउन्ड सिस्टम तथा ध्वनि उपकरण प्रयोग नगर्न र अस्पताल तथा वृद्धाश्रमजस्ता संवेदनशील क्षेत्रमा विशेष सावधानी अपनाउन भनिएको छ।
सार्वजनिक तथा निजी सम्पत्तिको संरक्षण गर्दै वातावरणीय स्वच्छता कायम राख्न र जथाभावी फोहोरमैला नगर्न पनि प्रशासनले सचेत गराएको छ।
सूचनामा उल्लेखित निर्देशनविपरीतका गतिविधि गरेको पाइएमा कानुनबमोजिम कारबाही हुने चेतावनीसमेत दिइएको छ।
देउसी–भैलो सञ्चालन वा चाडपर्व मनाउने क्रममा कुनै शङ्कास्पद गतिविधि देखिएमा, दुर्घटना भएमा वा समस्या उत्पन्न भएमा प्रहरी नियन्त्रण कक्षको १०० नम्बर वा जिल्ला आपत्कालीन कार्य सञ्चालन केन्द्र (DEOC) को १२३४ नम्बरमा सम्पर्क गर्न प्रशासनले अनुरोध गरेको छ।
