धरानः बी.पी. कोइराला स्वास्थ्य विज्ञान प्रतिष्ठान (बीपीकेआईएचएस), धरानमा आवास व्यवस्थापन तथा सुविधा उपलब्ध गराउने क्रममा प्रचलित नियम र कार्यविधिको उल्लंघन भएको भन्दै प्रतिष्ठानका कर्मचारीहरूले रजिष्ट्रारसमक्ष ध्यानाकर्षण गराएका छन् ।
कर्मचारीहरूले असोज २६ गते (२०८३/०६/२६) प्रतिष्ठानका रजिष्ट्रारलाई सम्बोधन गर्दै एक निवेदन दर्ता गराएका हुन् । निवेदनमा आवास व्यवस्थापनका क्रममा प्रचलित नियम, कार्यविधि तथा मापदण्डविपरीत मनोमानी ढङ्गले निर्णय र कार्यान्वयन भएको उल्लेख छ । यस्तो कार्यले सम्बन्धित कर्मचारीहरूमा असन्तुष्टि तथा असमानताको अवस्था सिर्जना गरेको निवेदकहरूको गुनासो छ ।
निवेदनमा विशेषगरी 'सिभिल लाइन' (Civil line) स्थित कोठा नम्बर '७ ई' (7E - धनेश्वर चौधरी) र कोठा नम्बर '३ जी' (3G - दिपिका सुनुवार) को विषयलाई समेत उल्लेख गरिएको छ ।
कर्मचारीहरूले आवाससम्बन्धी प्रचलित नियम तथा कार्यविधिको निष्पक्ष रूपमा अध्ययन गरी नियमविपरीत भएका कार्यहरू तत्काल सच्याउन माग गरेका छन् । साथै, आगामी दिनमा नियमअनुसार पारदर्शी र न्यायोचित व्यवस्था मिलाउन समेत उनीहरूले हार्दिक अनुरोध गरेका छन् ।
उक्त निवेदनमा संगीता कु. चौधरी, सरिता ठाकुर, जगजित मिश्रा, कुमारी रुबी देव र जानकी चौधरीले हस्ताक्षर गरेका छन् । निवेदनको बोधार्थ प्रतिष्ठानका उपकुलपति, अस्पताल निर्देशक, डीन, कर्मचारी कल्याण समाज, सामान्य प्रशासन शाखा र शिक्षाध्यक्षलाई समेत दिइएको छ ।
