इटहरी: सुनसरीको धरान उपमहानगरपालिका–११ सेवालुङ चोकमा जुवातास खेलिरहेको अवस्थामा प्रहरीले ११ जनालाई नियन्त्रणमा लिएको छ।
जिल्ला प्रहरी कार्यालय सुनसरीका अनुसार २०८३ कात्तिक २६ गते राति करिब १० बजे धरान–११ सेवालुङ चोकस्थित सञ्जुहाङ लिम्बूको घरमा जुवातास खेलिरहेको विशेष सूचनाका आधारमा इलाका प्रहरी कार्यालय धरानबाट खटिएको प्रहरी टोलीले छापा मारेको थियो।
प्रहरी टोलीले खानतलासी गर्दा जुवातास खेलिरहेको अवस्थामा ११ जनालाई पक्राउ गरेको हो। उनीहरूको साथबाट १२ बुक तास र नगद ५ लाख १२ हजार ५०० रुपैयाँ बरामद गरिएको जिल्ला प्रहरी कार्यालय सुनसरीले जनाएको छ।
पक्राउ पर्नेहरूमा धरान उपमहानगरपालिका–१६ का ३३ वर्षीय सोम तामाङ, धरान–११ का २४ वर्षीय सविन राई, ४० वर्षीय दिनेश राई, ४९ वर्षीय सञ्जुहाङ लिम्बू (घरधनी), २४ वर्षीय मचिन लिम्बू, ३२ वर्षीय पूर्ण राई, ४९ वर्षीय सन्तोष तामाङ, १७ वर्षीय रविन रसाइली, ४९ वर्षीय सुवास तामाङ, धरान–११ का ५० वर्षीय ओम राई र ताप्लेजुङको मिक्वाखोला गाउँपालिका–४ का ३५ वर्षीय अशोक साँवा रहेका छन्।
पक्राउ परेका सबैलाई इलाका प्रहरी कार्यालय धरानमा राखेर थप अनुसन्धान भइरहेको जिल्ला प्रहरी कार्यालय सुनसरीले जनाएको छ।
