इटहरीः सुनसरीको इटहरीमा छठ पर्वको अवसरमा आयोजित ऐतिहासिक शोभायात्राले धार्मिक सहिष्णुता, सामाजिक सद्भाव र सामुदायिक एकताको सन्देश दिएको छ। छठ पूजा सेवा समितिको आयोजनामा निकालिएको शोभायात्रामा विभिन्न जातजाति तथा समुदायका झाँकी प्रदर्शन गरिनुका साथै व्रतालु र सर्वसाधारणको उल्लेख्य सहभागिता रहेको थियो।
यस वर्षको शोभायात्राको मुख्य आकर्षण मुस्लिम समुदायका व्यक्तिहरूको सहभागिता बनेको आयोजकले जनाएको छ। केही समयअघि सुनसरीमा हिन्दु–मुस्लिम समुदायबीच देखिएको द्वन्द्वले राष्ट्रिय तथा अन्तर्राष्ट्रियस्तरमै चर्चा पाएको सन्दर्भमा छठ पर्वमा मुस्लिम समुदायको सहभागिताले आपसी सद्भाव र एकताको सकारात्मक सन्देश प्रवाह गरेको छठ पूजा सेवा समिति इटहरीका सल्लाहकार सुरेन्द्र चौधरीले बताए।
उनका अनुसार छठ सूर्यदेवको आराधना गर्ने साझा आस्थाको पर्व भएकाले यसमा जातजाति, धर्म र समुदायको कुनै सीमा हुँदैन। छठ पर्वले धार्मिक तथा सामुदायिक विभेदभन्दा माथि उठेर सबैलाई एउटै सूत्रमा बाँध्ने काम गरेको उनले बताए।
खोला तथा जलाशयका किनारमा सामूहिक रूपमा छठ पूजा गर्नुको विशेष सामाजिक र सांस्कृतिक महत्त्व रहेको चौधरीको भनाइ छ। छठ पर्वमा करिब ३६ घण्टासम्म कठोर व्रत बस्नुपर्ने भएकाले यो आस्था, धैर्य र समर्पणको पर्वका रूपमा स्थापित रहेको उनले बताए।
खोलाको घाटमा धनी–गरिब, जातजाति तथा समुदायबीच कुनै विभेद नगरी सबैले एउटै स्थानमा उभिएर सूर्यलाई अर्घ्य दिने परम्पराले समानता र एकताको सन्देश दिने गरेको उनले उल्लेख गरे।
यसैबीच, छठ पर्वका नाममा सडक तथा सार्वजनिक स्थानमा जथाभावी रकम माग्ने प्रवृत्तिप्रति आयोजकले चिन्ता व्यक्त गरेका छन्। परम्परागत रूपमा छठमा माग्ने चलन निश्चित धार्मिक विधि र मान्यताअनुसार सीमित घरपरिवारमा गरिने अभ्यास भए पनि पछिल्लो समय बाटो हिँड्ने यात्रु तथा सवारीसाधन रोकेर जबर्जस्ती रकम माग्ने प्रवृत्ति बढेको चौधरीले बताए।
यस्तो गतिविधिले धार्मिक आस्था र पर्वको मर्यादामा आँच पुर्याउन सक्ने भन्दै आयोजकले स्थानीय सरकार तथा प्रशासनलाई यसको उचित व्यवस्थापन र नियन्त्रणका लागि आग्रह गरेका छन्।
छठ पर्वको तयारीबारे जानकारी दिँदै आयोजकले हालसम्म करिब ९५ प्रतिशत काम सम्पन्न भएको जनाएका छन्। घाट व्यवस्थापनको काम पूरा भइसकेको र चारवटा पुल निर्माणको काम अन्तिम चरणमा पुगेको उनीहरूको भनाइ छ। बाँकी काम आजभोलिमै सम्पन्न गर्ने तयारी भइरहेको आयोजकले जनाएको छ।
धार्मिक आस्था, सामाजिक एकता र सांस्कृतिक विविधताको संगमका रूपमा मनाइने छठ पर्वले यस वर्ष इटहरीमा हिन्दु–मुस्लिम एकतासहित धार्मिक सहिष्णुता र सामुदायिक सद्भावको महत्वपूर्ण सन्देश दिएको छ।
