इटहरीः सर्वसाधारणलाई सुलभ, सहज र गुणस्तरीय स्वास्थ्य सेवा उपलब्ध गराउने उद्देश्यसहित श्रीकृष्ण प्रणामी प्रतिष्ठान इटहरीद्वारा सञ्चालित एमआरएस प्रणामी अस्पतालले न्यूनतम शुल्कमा विभिन्न स्वास्थ्य सेवा प्रदान गर्दै आएको छ। अस्पतालले सामान्य नागरिकदेखि आर्थिक रूपमा कमजोर अवस्थाका बिरामीलाई समेत सहज रूपमा उपचार सेवा उपलब्ध गराउने लक्ष्य राखेको अस्पताल प्रशासनले जनाएको छ।
अस्पतालमा ओपीडी सेवा लिन २०० रुपैयाँ मात्र शुल्क लाग्ने व्यवस्था गरिएको छ। त्यस्तै, विभिन्न स्वास्थ्य परीक्षण सरकारी तथा स्वास्थ्य बीमाले निर्धारण गरेको दररेटअनुसार उपलब्ध गराइँदै आएको अस्पताल प्रशासनले जनाएको छ।
अस्पतालमा भिडियो एक्सरे ८०० रुपैयाँ, एनोमली स्क्यान २ हजार ५०० रुपैयाँ, एसबीओएनसी परीक्षण ८५० रुपैयाँ र थाइराइड परीक्षण ९०० रुपैयाँमा गर्न सकिने व्यवस्था छ। त्यसैगरी, सुगर तथा प्रेसर परीक्षण निःशुल्क गरिँदै आएको छ।
बिरामीको उपचारका क्रममा आवश्यक पर्ने अक्सिजनसमेत निःशुल्क उपलब्ध गराउने व्यवस्था अस्पतालले गरेको छ। अस्पतालमा इमर्जेन्सी सेवा शुल्क २०० रुपैयाँ र बेड शुल्क दैनिक ४०० रुपैयाँ मात्र निर्धारण गरिएको छ। यसले न्यून आय भएका तथा सामान्य आर्थिक अवस्थाका नागरिकलाई उपचारमा सहजता पुग्ने अपेक्षा गरिएको छ।
अस्पतालमा बिहान ७ बजेदेखि दिउँसो ३ देखि ४ बजेसम्म विशेषज्ञ चिकित्सकहरूले नियमित रूपमा सेवा दिँदै आएका छन्। विभिन्न रोगका विशेषज्ञ चिकित्सकमार्फत परामर्श तथा उपचार सेवा उपलब्ध गराउँदै आएको अस्पतालले आगामी दिनमा स्वास्थ्य सेवालाई थप विस्तार गर्ने योजना बनाएको छ।
अस्पताल व्यवस्थापनका अनुसार छिट्टै स्वास्थ्य बीमा कार्यक्रममा आबद्ध हुने तयारीसमेत भइरहेको अस्पताल संचालक समितिका अध्यक्ष हेम घिमिरेले जानकारी दिए । स्वास्थ्य बीमामा आबद्ध भएपछि बीमित नागरिकले पनि अस्पतालबाट सहज रूपमा उपचार सेवा लिन सक्ने अपेक्षा गरिएको उनले बताए ।
नाफाभन्दा सेवामूलक भावनालाई प्राथमिकता दिँदै सञ्चालनमा रहेको अस्पतालले न्यून शुल्कमा स्वास्थ्य सेवा विस्तार गर्ने प्रयास गरेको छ। स्वास्थ्य सेवा सर्वसाधारणको पहुँचमा पुर्याउने उद्देश्यसहित अस्पतालले आगामी दिनमा ५ सय बेडको सेवा, सुविधा र पूर्वाधार विस्तारलाई प्राथमिकतामा राखेको घिमिरेले बताए । त्यसका लागि कोशी प्रदेश सरकारबाट १ करोड रुपियाँ बजेट बिनियोजन समेत भईसकेको छ । ५ सय बेड सहितको नयाँ अस्पताल भवन निर्माणका लागि नक्सा निर्माण कार्य सकिएको अस्पताल प्रशासनले जनाएको छ । अबको केही महिनाभित्रबाटै भवन निर्माणको कार्य आरम्भ हुने पनि प्रशासनले बताएको छ ।
