काठमाडौं: संयुक्त अरब इमिरेट्स (यूएई) र नेपालबीच व्यापार तथा लगानीका क्षेत्रमा सहकार्य विस्तार गर्ने विषयमा उच्चस्तरीय छलफल भएको छ। यूएईका वैदेशिक व्यापारमन्त्री डा. थानी बिन अहमद अल जेयुदी र नेपालका गृहमन्त्री सुदन गुरुङबीच भएको भेटवार्तामा दुई देशबीचको आर्थिक साझेदारीलाई थप सुदृढ बनाउने विषयले प्राथमिकता पाएको छ।
भेटवार्तापछि यूएईका मन्त्री अल जेयुदीले सामाजिक सञ्जाल ‘एक्स’मार्फत नेपालसँग व्यापार तथा लगानीका क्षेत्रमा लामो समयदेखि साझेदारी बढ्दै गएको उल्लेख गरेका छन्। उनले गृहमन्त्री गुरुङसँगको भेटमा दुई देशबीचको सहयोगलाई थप विस्तार गर्ने उपायबारे छलफल भएको र साझा प्राथमिकताहरूलाई अघि बढाउन नयाँ अवसरको खोजी गरिएको बताएका छन्।
उनका अनुसार नेपाल र यूएईबीचको विद्यमान सम्बन्धलाई आर्थिक सहकार्य र लगानीका नयाँ सम्भावनासँग जोड्दै आगामी दिनमा थप परिणाममुखी बनाउन दुवै पक्ष इच्छुक देखिएका छन्।
बुढीगण्डकीमा यूएईको लगानी प्रस्ताव
भेटवार्ताका क्रममा गृहमन्त्री गुरुङले नेपालमा यूएईको लगानी भित्र्याउने विषयसमेत उठाएका थिए। विशेषगरी राष्ट्रिय गौरवको आयोजना बुढीगण्डकी जलविद्युत् परियोजनामा यूएईको लगानी तथा सहकार्यका लागि उनले प्रस्ताव गरेका छन्।
त्यसैगरी नेपालको कृषि, सेवा क्षेत्र र सुरक्षा प्रविधिको विकासमा पनि यूएईसँग सहकार्य गर्न सकिने विषयमा छलफल भएको गृहमन्त्रीको सचिवालयले जनाएको छ।
सुरक्षा प्रविधि र संस्थागत सहकार्यमा पनि चासो
आर्थिक तथा व्यापारिक विषयसँगै दुई देशबीच सुरक्षा क्षेत्रको सहकार्य विस्तार गर्ने विषयले पनि छलफलमा स्थान पाएको थियो।
भेटमा सुरक्षा निकायलाई आधुनिक तथा प्रविधिमैत्री बनाउने, प्रविधिमा आधारित प्रहरी सेवा सञ्चालन गर्ने, गैरघातक सुरक्षा उपकरण उत्पादन गर्ने र सुरक्षा व्यवस्थापनमा आधुनिक प्रविधिको प्रयोग बढाउने विषयमा विचार आदानप्रदान भएको थियो।
विशेषगरी ‘फेसलेस पुलिसिङ’को अवधारणा र सुरक्षा निकायको आधुनिकीकरणमा सहकार्यका सम्भावनाबारे दुवै पक्षले चासो देखाएका थिए।




















