प्रेम बास्तोला
इटहरीः नेपाली जनजीवन, मौलिकता र सांगीतिक भावनालाई पश्चिमा संगीतसँग जोडेर फरक स्वादका गीत–संगीत प्रस्तुत गर्दै आएको इटहरीको स्थापित नेक्सस ब्यान्ड नयाँ एल्बमसहित दर्शकमाझ आउने भएको छ।
आठवटा गीत समावेश गरिएको नयाँ एल्बम ब्यान्डले लाइभ कन्सर्टमार्फत सार्वजनिक गर्न लागेको हो। इटहरीस्थित के क्लबमा मंसिर ५ गते अर्थात शनिवार दिउँसो ठीक ३ बजे आयोजना हुने कार्यक्रममा ब्यान्डले एल्बममा समावेश नयाँ गीतहरू प्रत्यक्ष प्रस्तुत गर्नेछ। त्यसको भोलिपल्ट झापाको बिर्तामोडस्थित मोक्षमा समेत ब्यान्डको लाइभ कन्सर्ट आयोजना हुनेछ।
बिहीबार बिहान इटहरीको सोसल क्याफेमा आयोजित पत्रकार भेटघाटमा ब्यान्डले उक्त जानकारी दिएको हो।
नेपाली जनजीवनका कथा, भावना र मौलिक सांगीतिक पक्षलाई पश्चिमा संगीतको शैलीसँग सम्मिश्रण गरेर फरक सांगीतिक प्रस्तुति तयार पारिएको ब्यान्डका सदस्य नवीन न्यौपानेले जानकारी दिए। नेपालीपनलाई आधुनिक संगीतसँग जोड्दै छुट्टै पहिचान स्थापित गर्ने प्रयास ब्यान्डको विशेषता रहेको उनको भनाइ छ।
ब्यान्डका संस्थापक तथा सदस्यहरूमा मनोज राई (लिड गिटार), नवीन श्रेष्ठ (ड्रम), पवन लिम्बू (भोकल), नवीन न्यौपाने (बेस गिटार) र सुजन लिम्बू (गिटार) रहेका छन्। पाँच सदस्यीय ब्यान्डका केही सदस्य हाल विदेशमा रहेकाले सबैजना कन्सर्टमा सहभागी हुन नसक्ने अवस्था छ। सुजन लिम्बू बेलायतमा र अर्का एक सदस्य अमेरिकामा छन् भने संस्थापक मनोज राई फ्रान्सबाट फर्किसकेका छन्।
नयाँ एल्बममा समावेश आठमध्ये चारवटा गीतको मिक्सिङ तथा मास्टरिङ बेलायतमा गरिएको ब्यान्डले जनाएको छ। ग्रामी अवार्डसँग सम्बन्धित एक संगीतकर्मीमार्फत ती गीतको मिक्सिङ तथा मास्टरिङ गराइएको र यसका लागि उल्लेख्य खर्चसमेत गरिएको जानकारी दिइएको छ। एल्बमको ध्वनि गुणस्तर र अन्तर्राष्ट्रियस्तरको सांगीतिक प्रस्तुतिमा विशेष ध्यान दिइएको ब्यान्डका गायक पवन लिम्बूले पत्रकार भेटघाटमा बताए।
इटहरी संगीत साधना प्रतिष्ठान नेपालका संस्थापक राजु केसीले इटहरीलाई सांगीतिक तथा सांस्कृतिक हबका रूपमा विकास गर्न यस्ता कार्यक्रमले महत्त्वपूर्ण योगदान पुर्याउने बताए। उनले इटहरीकै मौलिक र स्थापित ब्यान्डका गीत–संगीत सुन्न तथा प्रत्यक्ष प्रस्तुति हेर्न उपस्थित भएर संगीतकर्मीलाई उत्साह र प्रेरणा प्रदान गर्न संगीतप्रेमीलाई आग्रह गरे।
स्थानीय कलाकारले आफ्नै ठाउँबाट नेपाली संगीतमा नयाँ प्रयोग र सिर्जना गरिरहेको अवस्थामा यस्ता ब्यान्डलाई स्थानीय समुदायले माया र साथ दिन आवश्यक रहेको केसीको भनाइ छ।
नेक्सस ब्यान्डको नयाँ एल्बम तथा लाइभ कन्सर्टलाई इटहरीको सांगीतिक पहिचान र स्थानीय प्रतिभाको प्रवर्द्धनसँग जोडेर हेरिएको छ। नेपाली मौलिकता र पश्चिमा संगीतको सम्मिश्रणमार्फत फरक सांगीतिक स्वाद पस्कने ब्यान्डको प्रयासले स्थानीय संगीतप्रेमीलाई नयाँ अनुभव दिने अपेक्षा गरिएको छ।
इटहरीमै जन्मिएको र यहीँको सांगीतिक वातावरणमा हुर्किएको ब्यान्डलाई स्थानीय दर्शकको साथ र समर्थनले थप सिर्जनात्मक यात्रामा अघि बढ्न प्रेरणा मिल्ने विश्वास ब्यान्डका संस्थापक मनोज राईले व्यक्त गरे।




















