अन्ताल्या (टर्की): कृषि तथा प्राकृतिक स्रोत समितिका सभापति एवं सुनसरी क्षेत्र नं. ३ का प्रतिनिधिसभा सदस्य अशोक कुमार चौधरीले हिन्दुकुश हिमालयको संरक्षणलाई विश्वव्यापी जलवायु कार्यसूचीको उच्च प्राथमिकतामा राख्नुपर्नेमा जोड दिएका छन्।

संयुक्त राष्ट्रसंघीय जलवायु परिवर्तनसम्बन्धी सम्मेलन COP31 को अवसरमा टर्कीको अन्ताल्यामा भारतका वन, वातावरण तथा जलवायु परिवर्तनमन्त्री भूपेन्द्र यादवसँग भएको भेटवार्तामा सभापति चौधरीले यस्तो धारणा राखेका हुन्।

भेटका क्रममा चौधरीले हिन्दुकुश हिमालयको संरक्षण नेपालको राष्ट्रिय प्राथमिकताको विषय भएको उल्लेख गर्दै यसलाई क्षेत्रीय मुद्दामा मात्र सीमित नराखी विश्वव्यापी जलवायु कार्यसूचीको महत्वपूर्ण विषय बनाउनुपर्ने बताए।

WhatsApp Image 2026-11-19 at 13.05.05

‘हिन्दुकुश हिमालयको संरक्षण हाम्रो साझा भविष्यसँग जोडिएको विषय हो। यसको संरक्षणका लागि अन्तर्राष्ट्रिय समुदायको साझा प्रतिबद्धता र सहकार्य आवश्यक छ,’ उनले भने।

भेटवार्तामा जलवायु परिवर्तनका असर न्यूनीकरण, हिमालय क्षेत्रको संरक्षण, जैविक विविधताको जगेर्ना, वन्यजन्तु संरक्षण तथा विपद् जोखिम व्यवस्थापनलगायतका विषयमा छलफल भएको थियो।

त्यसैगरी, जलवायु परिवर्तनले नेपाल र भारतलगायत हिमालय क्षेत्रका मुलुकमा पारिरहेको प्रभावलाई सम्बोधन गर्न तथा प्राकृतिक स्रोत र जैविक विविधताको संरक्षणका लागि नेपाल–भारतबीचको सहकार्यलाई थप सुदृढ बनाउने विषयमा पनि कुराकानी भएको जनाइएको छ।

हिन्दुकुश हिमालय क्षेत्र जलवायु परिवर्तनका दृष्टिले संवेदनशील मानिन्छ। यस क्षेत्रको संरक्षण र दिगो व्यवस्थापनका लागि क्षेत्रीय तथा अन्तर्राष्ट्रिय सहकार्य आवश्यक रहेको सन्देश चौधरीले भेटवार्तामार्फत दिएका छन्।