इटहरी: बैंकिङ कसुर मुद्दामा अदालतबाट दोषी ठहर भई फरार रहेका सुनसरीको इटहरीका एक जनालाई प्रहरीले पक्राउ गरेको छ।

पक्राउ पर्नेमा इटहरी उपमहानगरपालिका–८ निवासी ४८ वर्षीय सूर्यबहादुर अधिकारी रहेका छन्।

जिल्ला प्रहरी कार्यालय सुनसरीका अनुसार अस्थायी प्रहरी चौकी पुष्पलालचोक र सामुदायिक प्रहरी बिट गैंसारबाट संयुक्त रूपमा खटिएको प्रहरी टोलीले बुधबार बिहान १०ः३० बजे अधिकारीलाई उनकै घरबाट पक्राउ गरेको हो।

sunsari police

अधिकारीलाई सुनसरी जिल्ला अदालत इनरुवाले २०८१ साउन २६ गते बैंकिङ कसुर मुद्दामा दोषी ठहर गर्दै १ लाख ३० हजार रुपैयाँ जरिवाना र सात दिन कैद सजाय सुनाएको थियो।

अदालतको फैसला कार्यान्वयनका क्रममा फरार रहेका उनलाई खोजतलास गर्ने क्रममा पक्राउ गरिएको जिल्ला प्रहरी कार्यालय सुनसरीले जनाएको छ।

पक्राउ परेका अधिकारीलाई आवश्यक कानुनी कारबाहीका लागि इलाका प्रहरी कार्यालय इटहरीमा राखिएको प्रहरीले जनाएको छ।