विराटनगरः मदन भण्डारी स्पोर्ट्स एकेडेमी प्रदेश १ का अध्यक्ष तथा नेकपा मोरङका युवा नेता सागर थापाले सीएमजी स्वास्थ्य क्लबलाई खेल सामग्री प्रदान गरेका छन् ।
शुक्रबार थापाले क्लबलाई १५ हजार मूल्य बराबरको खेल सामग्री हस्तान्तरण गरेका हुन् । ती खेल सामग्री क्लबका अध्यक्ष किशोर धमला, उपाध्यक्ष रोहित कोइराला, कोषाध्यक्ष शिवराज राईलगायतले बुझिलिएका छन् ।
खेल सामग्री हस्तान्तरण गर्दै अध्यक्ष थापाले खेलकुदले युवा पुस्तामा सकारात्मक र एकताको भावना विकास गर्ने बताए । उनले खेलकुदमा हुने एकता, लगनशीलता, अनुशासन र सकारात्मक प्रतिष्पर्धालाई सवै क्षेत्रमा अवलम्बन गर्न सके राष्ट्रिय नारा ‘समृद्ध नेपाल र सुखी नेपाली’लाई समेत सार्थक बनाउन सहयोग पुग्ने बताए ।
मदन भण्डारी स्पोर्ट्स एकेडेमीले खेलकुदका क्षेत्रमा यस्ता सहयोग निरन्तर गर्दै जाने उनको भनाइ थियो । अध्यक्ष थापाले प्रदेश १ खेलकुदका क्षेत्रमा अग्रणी रहेको चर्चा गर्दै यो गरिमा सदैव कायम राख्न स्पोटर््स एकेडेमी योजनाबद्ध रूपमा अघि बढेको बताए ।
क्लबका अध्यक्ष किशोर धमलाले खेल सामग्री प्रदान गरी खेलकुदमा निरन्तर लाग्न हौसला प्रदान गरेको भन्दै युवा नेता थापालाई धन्यवाद दिए ।