इलामः हिमालयन शेर्पा क्लब इलाममा जारी पाँचौँ अन्तर्राष्ट्रिय आमन्त्रण माइभ्याली गोल्डकपको फाइनलमा प्रवेश गरेको छ ।
आज काँकरभिट्टा फुटबल ट्रेनिङ सेन्टर (मेची नेत्रालय) झापालाई शून्यका विरुद्ध तीन गोल गर्दै उसले फाइनलमा आफ्नो स्थान सुरक्षित गरेको हो ।
जीतका लागि हिमालयनका तर्फबाट खेलको पहिलो हाफको इञ्जुरी समयमा जर्सी नं १७ का त्रिदेव गुरुङले गोल गर्दै आफ्नो टोलीलाई अग्रता दिलाएका थिए । त्यस्तै, दोस्रो हाफको १७ औँ मिनेटमा हिमालयका जर्सी नं ४ का रवि थापाले गरेको प्रहार झापाका जर्सी नं १५ का विष्णु सुनुवारको खुट्टामा लागेर गोलमा परिणत भएको थियो ।
पुनः दोस्रो हाफको इञ्जुरी समयमा हिमालयनका जर्सी नं १३ का बिसन गुरुङले थप १ गोल गर्दै हिमालयनले माइभ्याली गोल्डकपको फाइनलमा आफ्नो स्थान पक्का गरेको हो ।
झापाका खेलाडीले थुप्रै पटक गोल गर्ने अवसर प्राप्त गरे पनि गोल गर्न सकेनन् । अन्ततः झापा सेमीफाइनलबाटै बाहिरिन पुग्यो । खेलको ‘म्यान अफ दी म्याच’ हिमालयनकै गोल किपर किशोर गिरी घोषित भए । उनले नगद १० हजारसहित मेडल प्राप्त गरे ।
फाइनल खेलमा मङ्गलबार हिमालयनले अफ्रिकन मुलुक क्यामरुनको दाउफिन्स क्लबसँग प्रतिस्पर्धा गर्नेछ । क्यामरुनले सेमीफाइनलमा नेपाल पुलिसलाई हराउँदै फाइनलमा प्रवेश गरेको हो ।
_1720278409.jpg)
