इलामः काँकडभिट्टामा जारी चौथो मेची नेत्रालय मेचीनगर गोल्डकपको पहिलो क्वाटरफाइनल खेलमा आयोजक मेची नेत्रालय काँकडभिट्टा फुटबल ट्रेनिङ सेन्टरले आज सीएमजी सङ्कटा क्लबको सामना गर्दैछ ।

काँकडभिट्टा माविको खेलमैदानमा आयोजना भइरहेको प्रतियोगितामा आयोजकलाई पछिल्लो पराजयको बदला लिने अवसर हुनेछ । धरानमा सम्पन्न २१ औँ बुढासुब्बा गोल्डकपको उद्धघाटन खेलमा सङ्कटाले काँकडभिट्टामाथि जीत निकाल्दै सेमीफाइनलमा पुगेको थियो । समय अभावका कारण २ दिन सञ्चालन भएको खेलमा सडनडेथमा सङ्कटाले जीत निश्चित गरेको थियो ।

आजको खेलमा घरेलु मैदानमा जीतका साथ सेमीफाइनल पुग्ने आयोजक टोलीको लक्ष्य रहेको छ । यसअघि पहिलो प्रि–क्वाटरमा उपाधिको दाबेदारको रूपमा हेरिएको क्यामरुनी टोली दाउफिन्समाथि टाइब्रेकरमा शानदार जीत निकाल्दै आयोजक क्वाटरफाइनलमा पुगेको हो । खेल अपराहन्न ३ बजे शुरु हुनेछ ।

घरेलु टोली झापाली खेलाडीसहित मैदान उत्रँदा सङ्कटालाई केही विदेशी खेलाडीको साथ रहनेछ । सङ्कटा गत महिना काभ्रेमा सम्पन्न प्रथम काभ्रे गोल्डकप जितेर लयमा रहेको छ भने काँकडभिट्टाले जारी सिजनमा कुनै पनि उपाधि आफ्नो पक्षमा पारेको छैन ।