बेलबारीः मोरङको बेलबारी नगरपालिकाको वडा नम्बर ३ को आयोजनामा शुरु भएको टोल विकास संस्थास्तरीय फुटबल प्रतियोगिताको उपाधि सुन्दर टोल विकास संस्थाले हात पारेको छ ।
शनिबार टुक्रे खेल मैदानमा भएको प्रतियोगितामा सहकारी र भगवती टोल विकास संस्थाको संयुक्त समूहलाई पाखा लगाउँदै १–० गोल अन्तरले सुन्दर टोल विकास संस्थाले उपाधि हासिल गरेको हो । प्रतियोगिता शुरु भएको ८ मिनेट २५ सेकेण्डमा सोनु राईले गरेको गोल नै सुन्दर टोल विकास संस्थालाई उपाधि दिलाउन पर्याप्त बन्यो ।
प्रतियोगितामा संयुक्त समूहका राजकुमार राई उत्कृट खेलाडी घोषित भए । उनले नगद ५ हजार १ सय रुपैयाँ पाए । यस्तै उत्कृट गोलकिपरमा सुन्दर टोलका अमकस धिमाल भए । म्यान अफ द म्याच भने सुन्दर टोलकै विष्णु गौतम भएका छन् ।
प्रतियोगितामा प्रथम हुनेले नगद १५ हजारसहित मेडल र प्रमाण पत्र तथा दोस्रो हुनेले नगद १० हजारसहित मेडल र प्रमाण पत्र प्राप्त गरेको वडाध्यक्ष योगेन्द्र सुवेदीले बताए ।
प्रतियोगिताको समापन गर्दै बेलबारी नगरपालिकाका मेयर ज्ञानेन्द्र सुवेदीले खेलकुदको क्षेत्रबाट नगरलाई चिनाउने बताए । उनले राष्ट्रिय स्तरका प्रतियोगितामा बेलबारीका खेलाडीले सहभागिता जनाउने गरी खेलकुद क्षेत्रको विकास भइरहेको बताए ।
_1720278409.jpg)
