धनकुटाः धनकुटामा जारी प्रदेश नम्बर १ स्तरीय महिला भलिबलको उपाधि सखुवासभाले उचालेको छ ।

सामाजिक विकास मन्त्रालयको आयोजनामा धनकुटाको तल्लो टुँडिखलमा सञ्चालन भएको खेलमा सङ्खुवासभाले सुनसरीलाई २५–१७, २५–१७ र २५–१६ को सोझो सेटमा पराजित गरेको हो ।

उपाधिसँगै सङ्खुवासभाले नगद १ लाखसहित कप, मेडल र प्रमाण–पत्र प्राप्त गरेको छ । त्यस्तै उपविजेता सुनसरीले नगद ५० हजारमा चित्त बुझाएको छ । खेलमा विभिन्न विधामा उत्कृष्ट ५ जनालाई नगदसहित पुरस्कार वितरण गरिएको थियो । प्रतियोगितामा प्रदेश नम्बर १ का १४ जिल्लाका १४ टिम सहभागी थिए ।