धनकुटाः आयोजक धनकुटालाई हराउँदै बिर्ता युनाइटेड क्लब झापा शहीद भीमनारायण गोल्डकप फुटबल प्रतियोगिताको सेमीफाइनलमा प्रवेश गरेको छ ।

विकेस लिम्बूको ह्याट्रिकको मद्धतले आयोजक धनकुटालाई ७—० गोलले हराउँदै झापा विजयी भएको हो । झापाका जर्सी नं ८ का खेलाडी मनिष थापाले ९ औँ मिनेटमा पहिलो गोल गरी आफ्नो टिमलाई अग्रता दिलाएका थिए । त्यस्तै जर्सी नं १३ का विकेस लिम्बूले ३७ औँ मिनेटमा गोल गर्दै आफ्नो टिमलाई पहिलो हाफमै २—० ले अग्रता दिलाए । दोस्रो हाफका ५६ औँ र ८७ औ मिनेटमा विकेस लिम्बूले थप २ गोल गरे ।

त्यस्तै मनिष थापा, राजकुमार कन्दङ्वा र एञ्जल गुरुङले ६२, ९१ र ९२ मिनेटमा गोल गर्दै आफ्नो जीत सुनिश्चित गरे । झापाको सामु धनकुटाका खेलाडी निरीह देखिएका थिए । ह्याट्रिकसँगै झापाका विकेस लिम्बू खेलको म्यान अफ द म्याच घोषित भए । आजकोे खेल सुनसरी र क्यामरुनको दाउफिन्स क्लबबीच हुने आयोजकले जनाएको छ ।