बेलबारीः मोरङको बेलबारीमा असार १३ गतेदेखि अन्तरपालिका स्तरीय मेयरकप फुटबल प्रतियोगिता सञ्चालन हुने भएको छ ।

प्रतियोगितामा ११ ओटा स्थानीय तहले भाग लिने मेयर कप फुटबल प्रतियोगिता आयोजक समितिले बेलबारीमा पत्रकार सम्मेलनको आयोजना गरी जनाएको छ । प्रतियोगितामा बेलबारीका दुई ओटा समूहले सहभागिता जनाउने भएका छन् ।

केराबारी, लेटाङ, विराटनगर, कानेपोखरी, उर्लाबारी, सुन्दरहरैचा, रतुवामाई, ग्रामथान, मिक्लाजुङ र पथरीशनिश्चरेको सहभागिता रहने आयोजक समितिका सचिव मिलन राईले बताए । सो प्रतियोगिताका विजेताले नगद १ लाख ५१ हजार र उपविजेताले १ लाख १ हजार रुपैयाँ पाउने छन् ।

प्रत्येक खेलमा म्यान अफ द म्याचले २ हजार ५ सय, उत्कृष्ट गोलकिपर, उत्कृष्ट मिल्ड फिल्डर, उत्कृष्ट डिफेन्सर, उत्कृष्ट स्ट्राइकर, हाइ स्कोरर, उत्कृष्ट प्रशिक्षक र सर्वोत्कृष्ट खेलाडीलाई नगद ७ हजार रुपैयाँसहित ट्रफी मेडल र प्रमाणपत्र प्रदान गरिने आयोजकले जनाएको छ ।

असार १३ गतेदेखि २१ गतेसम्म बेलबारी रङ्गशालमा सो प्रतियोगिता हुने आयोजकले जनाएको छ ।