यस्तो पनि पर्यटन ?

१ घण्टे लज बसाइले कसरी होला पर्यटनको विकास ?

  • आश्विन ३१, २०७५
  • १०५२ पटक पढिएको
  • विकास आचार्य
alt

समयः सोमबार बेलुका साँझ छ बजे
स्थानः साँघुरीगढी गाउँपालिकाको नाम्जे
मौसमः शरीरमा काँडा उम्रने जाडो एवं चिसो हावा बहिरहेको
पात्रहरूः आधुनिक युवा र म

तातो धरानलाई केही क्षण भुलौं भनेर बेलुका साँघुरीगढीको नाम्जे पुगेको थिएँ । लुगा धरानमा लगाएकै हाफपेण्ट र भेस्ट थियो । सवारी साधनबाट ओर्लनेबित्तिकै थाहा भयो चिसो हावा सररर चलिरहेको रहेछ । पाखुराभरी काँडाहरू एक्कासी उम्रिए । असोजको धरान छोडेर त्यहाँ पुगेको त्यहाँ त पुस लागिसकेको रहेछ ।

सुनसान उकालो बाटो र खुड्किला उक्लिँदै नाम्जेको आकर्षण ‘आत्माघर’ तर्फ चढ्दा बाटोमा केवल चिसो हावा र रूखहरूमा त्यो ठोक्किएर निस्किएको एकोहोरो ध्वनि स्वाँ...मात्र कानमा प्रवेश गरिरहेको थियो । आत्माघर जाने बाटोमा वास्तवमै नामजस्तै निर्जन र भयावह अनुभव भइरहेको थियो ।

उकालोले पसीना ननिकाले पनि एकाएक शरीर तातो हुँदै आयो । पृष्ठभूमिमा कुनै भयानक प्रेतात्मा प्रधान चलचित्रमा जस्तो आवाज र जीवन्तताको नामोनिशान नदेखिएको उक्त उकालो चढाइको अवधिभर मभित्रको आत्मा काँपिरह्यो । आत्माघरमा जाँदै गर्दा आत्मा नै भयातुर हुनु कस्तो आश्चर्य ? हुन त मान्छेहरू पनि मान्छेसँगै त हो डराउने अनि आत्मा आत्मासँग किन नडराओस् त ?

bikas acharya

सर्वप्रथम त डर अनुभव गर्न त्यहाँको नाम काफी थियो । त्यसमाथि साँझको बेला, टाढाटाढासम्म मानिसको अस्तित्व नदेखिएको निर्जन स्थान, अझ मौसमले पनि डर बढाउन आफ्नो भूमिका कुशलतापूर्वक निर्वाह गरेकै थियो । कुहिरोले ढाकिएको डाँडाको शिरमा उछिट्टिएर भीरमा ठडिएजस्ता देखिने लालीगुराँसका बोटहरू साँच्चै कहालीलाग्दा देखिन्थे ।

सन्ध्याले लगभग छोपिसकेको समयमा जाडोले काम्दै आत्माको घरभित्र हत्तपत्त पसेको मात्र थिएँ म त शीताङ्ग भएँ । मुटु जोडजोडले धड्कियो अनि डरले शरीरभर एक प्रकारको अनौठो विद्युत तरङ्ग प्रवाहित गर्यो । म सँगसँगै उति नै हस्याङफस्याङ गर्दै एक युवती र दुई युवक आत्माघरको भुइँबाट जुरूक्क उठे । अस्तव्यस्त केश मिलाउँदै उठेकी युवतीको अवस्था स्यालले आक्रमण गरेको पोथी कुखुराको जस्तै थियो ।

सङ्कोच र शरमले कहिले बास नगरेको उसको अनुहारमा कुनै प्रकारको प्रतिक्रिया देखिएन । कस्तो अचम्म ? एउटी नारीमा नारीको गहना अर्थात् लज्जाको रतिभर उपस्थिति छैन । दुई युवकले त झन् शिकारलाई गुलेलीले हान्ने बेलामा कसैले हल्ला गरेर शिकार धपाइदिएपछिको शिकारीको जस्तो बल्ढ्याङ्ग्रे आँखाले काँचै खाउँला झैं गरेर मलाई हेरे । धक र शरम केही नमानी तिनै जना तीव्र गतिमा मेरै आडबाट पार भएर ओरालो लागेर अदृश्य भए ।

उनीहरूको गतिसँगै रक्सीको तिखो गन्ध पनि मेरो नाकमा पस्यो । अनि पो म वास्तविकतामा उत्रिएँ । समाज आधुनिक भएको हो वा पुस्ता अधोगतिमा कुदेको हो सबैको ध्यान यौनतिर मात्र छ त ?

म पनि त्यसपछि खुरुखुरु ओरालो लागेँं । तल डाँडाको फेदमा, त्यो आकर्षक प्रवेशद्वारको नजिकै बनाइएको फलैंचामा २ जना युवक चाहिँ बसेका थिए । युवतीको अत्तोपत्तो थिएन । म नरोकिई पार भएँ तर मेरो कानले पुरूष आवाज सुनिहाल्यो ।
‘यो मा.....आज नआएको भए काम भइहाल्थ्यो ।’

त्यहाँबाट सरासर खाजा खान भनेर एउटा सानो होटलभित्र पसेर खानेकुरा मागेर पर्खिन थालें । मेरै अगाडिको टेबुल भएको कुर्सीमा एउटा उत्तर आधुनिक देखिने युवक आएर बस्यो । मकैको जुँगा रङको कपालमाथि कालो चस्मा लगाएको उसले आफ्नो बाँसजस्तो पातलो जिउमा गम्लङ्ग ज्याकेट लगाएको थियो । जाडो हुन्छ भनेर उसलाई पहिले नै जानकारी भएको प्रमाण त्यही लगाएको ज्याकेट थियो । केही बेर चुरोट खाँदै बसेको केटो एक्कासी सडकमा पुगेर बाटोको परसम्म हेर्यो । लाग्थ्यो ऊ कसैलाई अधैर्य भएर पर्खिरहेको छ । ऊ फेरि आफ्नो कुर्सीमा आएर चुरोटको धुवाँमा आफूलाई र आफ्नो भविष्यलाई उडाउन थाल्यो । म पनि उसलाई अनि उसको गतिविधिलाई अध्ययन गर्दै आफूले मगाएको खाजा आइसकेकाले खान थालें ।

aatma ghar

एकछिनपछि एउटा स्कुटी बाहिर आएर रोकियो । एउटी केटी पछाडि राखेर आएको अर्को एउटा केटाको हुलिया लगभग पहिलो केटोको जस्तो नै थियो फरक यति थियो कि उसले चाहिँ चुस्स परेको दारी थियो । यसले पनि आर्मीको कम्ब्याक ओढेको थियो । तर बिचरी केटीको अवस्था नाजुक थियो । स्लिभलेस टिसर्ट लगाएकी ऊ लगलग कामिरहेकी थिई । तलको लाज मात्र एउटा अम्मल भरको हाफपेण्टले थामेको थियो । खुट्टामा मोजाबिना नै क्यान्भास लगाएकी थिई । मुखमा लगाएको सानो बुट्टे मास्कले उसको जाडो थाम्न नसकेकोले बाफको धुँवा मास्क छिचोलेर बाहिर निस्किएको देखिन्थ्यो ।

पहिलो युवक स्वागत गर्न बाहिरै पुग्यो । स्कुटीमा आउने केटोसँग हात मिलायो । आफ्नो हातको सल्केको चुरोटको ठुटो पनि स्कुटीमा आएको केटोलाई भिडाएर केटीतर्फ फर्कियो । केटोसँग केवल हात मिलाएको उसले केटीलाई भने गम्लङ्ङ अङ्गालो हालेर ‘हग’ गर्यो । अनि उसको काँधमा हात राखेरै होटलभित्र पसेर त्यही टेबलको कुर्सीहरूमा तिनै जना बसे ।

उनीहरूको सबभन्दा पहिलो अर्डर नै ‘लोकल गुराँसको बुज’ थियो । जाडो भगाउनका लागि भनेर केटीले पनि चुरोट तानेर धुँवा उडाउँदैथिई । उसको भविष्यजस्तै धुँवा पनि एउटा बक्ररेखामा अनिश्चित गन्तव्यतर्फ हराउँदै उडिरहेको थियो ।

स्कुटीमा केटी ल्याउनेले खोइ कुन चाहिँ लजमा कोठा बुक गरेको तर १ घण्टा मात्र बस्न मिल्ने बतायो । अर्को युवकले प्रश्नवाचक ढङ्गले केटीलाई हेर्यो । केटीले स्वीकृतिमा टाउको हल्लाई । छिटो गरौं न त भनेर स्कुटीवालाले भन्यो । तिनै जनाले रक्सीको चुस्कीसँगै सितनको रूपमा मगाएको ‘पोर्क फ्राइ’ को स्वाद हतारमै भए पनि लिन थाले ।

म भने नाम्जेको पर्यटनको विकास, होमस्टे, रातारात निर्माण भइरहेका होटल र लज अनि युवाहरूले पर्यटनको रूपमा बुझेको भिन्नै पाटो गम्भीरतापूर्वक सोच्दै बसें । १ घण्टे पर्यटनले आर्थिक पाटो त व्यवसायीहरूको सबल बनाउला तर समग्र स्थानको नाम बदनाम गराउन पनि यसले भूमिका खेल्छ भनेर स्थानीय सरोकारवालाहरू सचेत हुन जरूरी छ ।

प्रतिक्रिया दिनुहोस

महिला सञ्जालका गतिविधि गाउँगाउँमा पुर्याउन इटहरीकी उपमेयर संगीता चौधरीको आग्रह

इटहरीः इटहरी उपमहानगरपालिकाकी नव निर्वाचित उपमेयर संगीता कुमारी चौधरीले महिला संजालका गतिविधी गाउँगा ...

खेलाडीको विवरण संकलन गर्दै प्रदेश खेलकुद विकास बोर्ड

इटहरीः प्रदेश नम्बर एक सरकारको सामाजिक विकास मन्त्रालय अन्तर्गत रहेको प्रदेश खेलकुद विकास बोर्डले प् ...

गरिमा बैंकको वित्तीय साक्षरता कार्यक्रम इटहरीमा सम्पन्न, एक सय तीस बढीलाई बैंकिङ्ग शिक्षा

इटहरीः नेपाल राष्ट्र बैकबाट ‘ख’ बर्गको वित्तीय कारोबार गर्न इजाजत पाएको गरिमा विकास बैँक ...

इष्ट टुरिजम इभेन्ट म्यानेजमेन्ट एण्ड मिडिया प्रालिद्धारा प्रकाशित

प्रदेश पोर्टल डटकम

इटहरी उपमहानगरपालिका, सुनसरी, कोशी, नेपाल

  • कम्पनी दर्ता नं. १९४७९७/०७५/०७६
  • स्थायी लेखा नं. ६०६६४३६५८
  • सूचना विभाग दर्ता नं. ९३०/०७५–०७६
  • प्रेस काउन्सिल दर्ता नं. १७१/०७५–०७६
  • फोन नं.: +९७७ २५ ५८२६९०
  • मोबाइल नं.: +९७७ ९८४२०३७४०२
  • इमेल: pradeshportal@gmail.com
 
 
  • प्रबन्ध सम्पादकः प्रेमप्रसाद बास्तोला
  • प्रबन्धक :शुसिला उप्रेती
  • कार्यकारी सम्पादक :प्रकाश बञ्जरा
  • सह सम्पादक :शिशिर भट्टराई
  • प्रमुख संवाददाता :सुबिन बिश्वकर्मा
  • मार्केटिङ प्रमुख :देवराज पुरी
 

Copyright © 2018 / 2022 - Pradeshportal.com All rights reserved