यस्तो छ किराती समुदायले बनाएको इटहरीको बहुउद्देश्यीय सांस्कृतिक भवन

इटहरीः इटहरीको नाट्य क्षेत्रमा सक्रिय संस्था कलालयले पछिल्ला वर्षहरूमा नाटक मञ्चन गर्न तायारिची भवन रोज्न थालेको छ ।
इटहरी र सुन्दरहरंैचा जोड्ने बुढी खोलाको पुलदेखि पश्चिमतर्फ रहेको छ यो भवन । बुढी खोला किनारमा बनेको शान्त क्षेत्रको तायारिची भवन नाटकसँगै चलचित्र प्रदर्शनको रोजाइमा पनि पर्दै गएको छ । केही समय अगाडि एउटा चलचित्र उत्सव यहीँ भएको थियो । अरु सामान्य सभा सम्मेलनहरू त यहाँ प्रायः भइरहन्छन् ।

खोला किनारको शान्त ठाउँ । १५ कट्ठा हाराहारीको खुला क्षेत्र । हरियालीले घेरेको आकर्षक क्षेत्र । धारा, चौतारादेखि विभिन्न कलात्मक मूर्तिहरू छन् यो भवन परिसरमा । त्यही कारण धेरै कार्यक्रमहरूको रोजाइमा तायारिची परेको नाट्य निर्देशक तथा कलालय इटहरीका अध्यक्ष सोनु जयन्ती बताउँछन् । उनी भन्छन्, ‘कला क्षेत्रको लागि आवश्यक सुन्दर, शान्त र एकान्त ठाउँ त्यही लाग्छ इटहरीमा ।’

कला, संस्कृतिदेखि खेलकुदसम्मको प्याकेज
२०५८ मा चर्चामा आएर २०६७ बाट बनाउन शुरु भएको तायारिची भवन किराती कला र संस्कृतिको केन्द्र बनाउने गरी निर्माण भएको थियो । १५ तलाको इन्जिनियरिङ इस्टिमेट र डिजाइनका साथ बनेको यो भवनको हाल तेस्रो तला बन्ने क्रममा छ । भुइँ तलामा ५ सय सिट क्षमताको सभाहल छ । व्यवस्थित कुर्सी र लाइटको व्यवस्था छ ।

पहिलो तलामा तालीम केन्द्र, किरात राई यायोक्खाको महिला समिति, मुख्य समिति र सांस्कृतिक सामग्रीहरू सङ्कलन गरिएको कोठा छ । तेस्रो तलामा गेष्ट हाउस बनाउने गरी काम भइरहेको छ । हालसम्म १ करोड ५३ लाख बराबारको रकम खर्च भइसकेको छ ।

५० हजारदेखि ४ लाख रुपैयाँसम्म व्यक्तिगत रूपमा दाताले दिएका छन् । दाता र स्थानीय सरकारबाट गरी २ चरणमा १० लाख सहयोग आएको भवन निर्माण समितिका संयोजक रामप्रसाद राई बताउँछन् । ६९ वर्षीय राईका अनुसार साकेला नाच्ने स्थल खोज्दाखोज्दै यो स्थायी संरचनासम्म आइपुगिएको हो ।
अहिले यो क्षेत्रमा ब्याडमिन्टनदेखि आर्चरी (धनुषवाण) सम्मका खेल हुन्छन् । इटहरी शहरको कोलाहलबाट मुक्त हुन चाहने यतै आउन थालेका छन् । कला, संस्कृति, खेलकुद र घुमफिर स्थल सबै क्षेत्रमा तायारिची भवनले आफ्नो परिचय स्थापित गरिरहेको छ ।

कर्णबहादुर राईको अगुवाइमा भएको भवन निर्माण क्रमले अझै निरन्तरता पाइरहेको रामप्रसाद राई बताउँछन् । उनी भन्छन्, ‘हाम्रो पालोमा तीन तलासम्म बन्ला बाँकी तला नयाँ पुस्ताले ।’

क्यान्टिन र कभर्ड हल बन्दै
साकेला नाच्ने स्थलदेखि कला, खेलकुद र सभाको लागि लोकप्रिय बनेको तायारिची परिसरमा चाँडै क्यान्टिन बन्ने भएको छ । क्यान्टिनसँगै खेलकुदको लागि कभर्ड हल बनाउने तयारी भएको संयोजक राई बताउँछन् । ठूलो क्षेत्र भएकाले खेलकुदलाई व्यवस्थित गर्न र आगन्तुकहरूलाई भोकै नपठाउन क्यान्टिन र कभर्ड हल थप्ने योजना बनेको राईले बताए । उनले भने, ‘यो सबै काम सरकारी बजेटमा नभएर सामुदायिक चन्दाबाट हुने भएकाले पैसा सङ्कलन नहुन्जेल निर्माणले तीव्रता नलिएको हो ।’