वैज्ञानिकहरूले अक्सफर्ड–एस्ट्राजेनेकाको कोभिड खोप लगाएपछि मानिसमा हुने रगत जम्ने समस्याको कारण पत्ता लगाएका छन् । कार्डिफ र अमेरिकास्थित वैज्ञानिकहरूले खोपको एउटा मुख्य तत्वसँग रगतमा भएको प्रोटिन आकर्षित हुँदा उत्पन्न भएको प्रतिक्रियामा शरीरको प्रतिरोध प्रणाली पनि संलग्न हुने कारण रगत जमेको पत्ता लगाएका हुन् ।
कोरोना भाइरसको आनुवंशिक तत्त्व र निष्क्रिय पारिएको रुघाखोकी लगाउने भाइरस (एडिनोभाइरस) मिसाएर खोप बनेको हुन्छ । खोप मांसपेशीमा दिइने भए पनि कहिलेकाहीँ चुहिएर रक्तप्रवाहमा पुग्नसक्छ । यसले रगतमा हुने ’प्लेट्लट फ्याक्टर फोर’ नामक प्रोटीनलाई आकर्षित गर्छ । केही दुर्लभ अवस्थामा प्रतिरोध प्रणालीले प्लेट्लट फ्याक्टर फोरलाई शरीरले एडिनोभाइरसको एउटा भाग हो कि भनेर आक्रमण गर्न एन्टिबडी पठाउँछ ।
त्यही एन्टिबडी प्लेट्लट फ्याक्टर फोरसँग जोडिन पुग्दा रगत जम्न जान्छ । खोपका कारण उत्पन्न हुने रगत जम्ने समस्यालाई इम्यून थ्रोम्बोटिक थ्रोम्बोसिटोपेनिया भनिन्छ । साइन्स एड्भान्सेस नामक जर्नलमा प्रकाशित अध्ययनले एडिनोभाइरस र प्लेट्लट फ्याक्टर फोरबीच सम्बन्ध प्रमाणित गर्न सफल भएको छ । रगत जम्ने समस्या दुर्लभ भएकाले यी सबै चक्र पूरा हुन केही दुर्भाग्यपूर्ण घटनाक्रम हुने जनाइएको छ ।
कार्डिफको वैज्ञानिक टोलीलाई युके सराकारले समस्याको कारण पत्ता लगाउन आपत्कालीन आर्थिक सहयोग पनि उपलब्ध गराएको थियो । अध्ययनको प्रारम्भिक परिणाम प्रकाशित भएपछि एस्ट्राजेनेकाका वैज्ञानिकहरू पनि अनुसन्धानमा सहभागी भएका थिए । एस्ट्राजेनेका खोपले अहिलेसम्म झन्डै १० लाख मानिसलाई मृत्युबाट जोगाएको र पाँच करोडमा कोभिड हुन नदिएको अनुमान गरिएको छ । -बीबीसीबाट
