झापाः झापाको हल्दिबारीमा आफ्नै बाबुको हत्या आरोपमा प्रहरीले छोरालाई नियन्त्रणमा लिएको छ । गएराति २ बजे हल्दिबारी–२ पाराखोपी बजारपूर्व ६३ वर्षीय बासु राजवंशी आफ्नै घरको आँगनमा रहेको लिचीको बोटमा शङ्कास्पद अवस्थामा झुन्डिएको फेला परेका थिए ।
राजवंशीको टाउको र आँखामा चोट देखिएकोले घटना शङ्कास्पद देखिएपछि उनका छोरा ३० वर्षीय सुनिल राजवंशीलाई अनुसन्धानको लागि नियन्त्रणमा लिइएको जिल्ला प्रहरी कार्यालय झापाका प्रवक्ता डिएसपी कृष्णकुमार चन्दले बताउनु भयो । डिएसपी चन्द नेतृत्वको टोलीले ४ घण्टा लगाएर अनुसन्धान गरेपछि मृतक राजवंशीका छोरा सुनिललाई नियन्त्रणमा लिएको हो ।
झुन्डिएको अवस्थामा फेला परेका राजवंशीको टाउको, अनुहारसहित शरीरका विभिन्न भागमा चोट लागेको र अनुहारभरि रगत देखिएको वडाध्यक्ष शुकलाल राजवंशीले बताए। सुनिललाई नियन्त्रण लिएर जिल्ला प्रहरी कार्यालय झापामा राखिएको छ ।
मृतक बासु र उनका छोराबीच राति झगडा भएको बताइएको छ । छोराको लुगामा समेत रगत भेटिएको डिएसपी चन्दले बताए।
_1720278409.jpg)
