इटहरी : पुस १६ गते इटहरी उप-महानगरपालिका अगाडी र सुनसरी र मोरङ जोड्ने बुढी खोला पुलनजिक 'होक्स' राखेर आतङ्क सिर्जना गर्ने दुई जनालाई प्रहरीले पक्राउ गरेको छ ।
पक्राउ पर्नेमा यस अघि सुनसरी र झापामा पटक पटक बम विस्फोट गराउने कार्यमा संलग्न झापाको कनकलाई नगरपालिका– ८ का ४६ वर्षीय सञ्जय भनिने खगेन्द्र खरेल र लक्ष्मीदेवी थापा छन् ।
खरेल र थापालाई भारतमा लुकिछिपी बसेको अवस्थामा प्रहरीले केही दिन अघि पक्राउ गरेको हो । भारतबाट पक्राउ गरेर बुधवार राती मात्र सुनसरी ल्याइएको प्रहरी स्रोतको भनाई छ ।
पुस १६ गते भने खरेलले म्यासेज मार्फत बम राखेको भनेर प्रहरीलाई नै खबर गरेका थिए । पछि इटहरी उप-महानगरपालिका र बुढी खोला नजिक भेटिएको शङ्कास्पद वस्तु बम नभई 'होक्स'अर्थात् आतङ्क सिर्जना गर्न लाई बनाइएको सामाग्री रहेको पुष्टि भएको थियो ।
यी दुई स्थानमा होक्स राखेपछि खरेल भागेर भारत पुगेका थिए ।
खरेलको पृष्ठभूमि अनुसार उनी २०७६ वैशाख २८ गते गोर्खा जनमुक्ति पार्टीको नाममा झापाको कनकाई नदी पुलमा बम राखेको आरोपमा पक्राउ परेका थिए । २ वर्ष पाँच महिना कैदपछि झापा कारागारबाट छुटे पछि २०७८ माघ ९ र माघ १३ गते झापाका केही चर्चमा शङ्कास्पद बस्तु राखेपछि उनी फरार थिए । यो घटनामा भने झापा प्रहरीले ९ जनालाई पक्राउ गरेको थियो ।
त्यसपछि २०७८ चैत १४ इटहरी उपमहानगर– २ स्थित नवजागृति टोलको एक घरमा सुतली बम विस्फोट भएको घटनामा खरेल पूंन पक्राउ परेका थिए ।
यो घटनामा हाल पक्राउ परेकी थापाको पनि संलग्नता रहेको थियो । थापाकै घरमा राखेको सुतली बम विस्फोट हुँदा रविन थापा र लमजुङका शेरजङ गुरुङ घाइते भएका थिए । यो घटनामा इटहरी प्रहरीले खरेलसहित ४ जनालाई पक्राउ गरी कारागार चलान गरेको थियो ।
तर कारागारबाट छुटेपछि खरेल आफैले पुस १६ गते इटहरी उपमहानगरपालिका अगाडी र बुढी खोला पुल नजिक होक्स राखेर आतङ्क सिर्जना गरेका थिए ।
पक्राउ परेका खरेल र थापासँग थप अनुसन्धान भइरहेको प्रहरी स्रोतले जनाएको छ । अनुसन्धान पश्चात् दुवै जनालाई पत्रकार सम्मेलन गरी सार्वजनिक गर्ने तयारी गरिएको छ ।
