इटहरी : काठमाडौँको तीनकुने आन्दोलनपछि दुर्गा प्रसाईँ भाग्न प्रयोग भएको स्कारपियो इटहरीमा फेला परेको छ ।
प्रहरी स्रोतका अनुसार बागमती बिएबी ४२०८ नं को स्कारपियो इटहरीमा फेला परेको हो । उक्त स्कारपियो गाडीलाई काठमाडौँबाट आएको प्रहरी टोलीले फेला पारी काठमाडौँ लगेको छ ।
प्रहरीले उक्त गाडीमा दुर्गा प्रसाईँ सवार थिए कि थिएनन् भन्नेबारे भने थप अनुसन्धान जारी राखेको छ । प्रहरी स्रोतका अनुसार उक्त स्कारपियोको धनी समेतलाई नियन्त्रणमा लिएको बताइएको छ ।
साथै काठमाडौँबाट आएको प्रहरी टोलीले तीनकुने घटनामा संलग्न भएको आरोपमा झापाबाट ४ जना र सुनसरीबाट १ जनालाई समेत नियन्त्रणमा लिएको बताइएको छ ।
चैत १५ मा राजावादीले गरेको प्रदर्शनका जनकमान्डर दुर्गा प्रसाईँ थिए । उनकै कमान्डमा रहेको प्रदर्शन अराजक बन्दा २ जनाको ज्यान गएको थियो ।
