इटहरी: पक्राउ पुर्जी जारी भएको २० दिनपछि प्रहरीकै सेटिङमा इनरुवा नगरपालिका वडा नम्बर ६ का वडाध्यक्ष तथा नगरका प्रवक्ता सुमन थालालाई कारवाहीबाट बचाउन नाटकीय शैलीमा भगाइएको छ ।
साउन २० गते नै थापा विरुद्ध पक्राउ पुर्जी जारी भएको थियो । वडाध्यक्ष थापा ८ भदौसम्म कार्यालयको कामकाजमा खटिएको रेकर्डले देखाउँछ । ९ गते वडा सदस्यलाई कार्यवाहक दिएर उनी काठमाडौँ हिँडेका छन् । जिल्लाका प्रहरी प्रमुख एसपी सुमनराज तिम्सिनासँग राम्रो उठबस गर्ने थापालाई तिम्सिनाकै डिजाइनमा ८ भदौसम्म कामकाज गर्न लगाई नियत बस भगाइएको जिल्ला प्रहरी कार्यालय स्रोतको दाबी छ ।
उच्च अदालतको आदेश भन्दाअघि पीडित पक्षले सवारी दुर्घटना शरीर अङ्गभङ्ग फौजदारी संहिता अनुसार कारबाहीको माग गरी थापा विरुद्ध जाहेरी दरखास्त लिएर पटक पटक पीडित इलाका प्रहरी कार्यालय पकली धाउँदा दर्ता गरिएको थिइन् । उच्चको आदेशपछि प्रहरी बाध्य भई थापा विरुद्ध कानुन कारबाही अगाडि तयार भएको थियो ।
उच्च अदालतले पीडितको मुद्दा दर्ता नगर्नुको कारण माग गरेपछि कानुनी झमेलाबाट बच्नका लागि बाध्य भई जिल्ला प्रहरी कार्यालय सुनसरीले थापालाई पक्राउ गर्न श्रावण १६ गते मुद्दा दर्ता गरेको थियो । अदालतले २० श्रावणमै थापालाई पक्राउ गर्न जिल्ला प्रहरी कार्यालय सुनसरीलाई अनुमति दिएको थियो ।
अनुमति पाएपछि थापालाई पक्राउ गर्न साटो जिल्लाका प्रहरी प्रमुख तिम्सिना आफै सक्रिय भई पटक पटक सुनसरीका विभिन्न स्थानमा छलफलमा बसेको स्रोतको दाबी छ । ८ भदौसम्म थापा वडाकार्यलयमा कामकाज गरेको अर्थात् पक्राउ पुर्जी जारी भएको २० दिनसम्म वडा कार्यालयमै काम गरेको व्यक्तिलाई फरार रहेको र खोजीका लागि प्रहरी परिचालन गरेको भन्ने प्रहरी प्रमुख तिम्सिनाले दिएको अभिव्यक्तिले उनको संलग्नता रहेको पुष्टि गर्छ ।
स्रोतका अनुसार थापालाई प्रहरीकै डिजाइनमा भगाउनु अघि इनरुवा नगरपालिकाका मेयर केदार भण्डारी पनि निकै लागि परेका थिए । थापा भण्डारीका विश्वासपात्र हुन् । ठेकेदार समेत रहेका थापासँग विभिन्न व्यावसायिक कार्यमा अनसिनका रूपमा मेयर भण्डारीसमेत साझेदार पार्टनरका रूपमा कार्य गर्दै आएको उनी निकट स्रोतको दाबी छ ।
पक्राउ पुर्जी जारी भएकै अवस्थामा राम्रै रकम(पैसा) दिएर जाहेरीकर्तालाई मुद्दा फिर्ता गराउने योजना प्रहरी प्रमुख तिम्सिनाकै सल्लाहमा मेयर भण्डारी र वडाध्यक्ष थापाले बुनेका थिए । योजना अनुसार नै मेयर भण्डारीकै नेतृत्वमा २५ श्रावणमा इटहरीको मितेरी होटेल आएका थिए । वडाध्यक्ष थापाले सो होटेलमा जाहेरीकर्ता इटहरी ४ कचना स्कुल छेउकी गीता खनालको पहाड गाउँले दाइ पर्ने इटहरी ४ कै पूर्व वडा सदस्य डिबी राईलाई भेटेका थिए । अघिल्लो दिनको फोन वार्ता अनुसार घटना मिलाइदिन राईलाई मध्यस्थताकर्ताका रूपमा थापाले अघि सारेका थिए ।
सो बेला मितेरी होटेलमा १ घण्टा बढी नै पैसामा घटना मिलाउने विषयमा छलफल भएको थियो । वडाध्यक्ष थापा र मेयर भण्डारीले घटना जसरी भए पनि मिलाई दिन राई सहित उपस्थित समूहलाई आग्रह गरेका थिए । उनीहरूले हालसम्म घाइते देवीका खनालको दोस्रो अप्रेसनपछि लागेका सबै उपचार खर्च दिलाउने,पूर्ण स्वास्थ्य नभएसम्म उपचारको जिम्मा लिने र त्यसमा थप केही लाखबढीनै रकम दिने प्रस्ताव गरेका थिए । कचना मावि व्यवस्थापन समितिका अध्यक्ष समेत रहेका डिबी राईले छलफलमा सो विद्यालयका प्रधानाध्यापक हरिशंकर घिमिरेलाई समेत बौद्धिक व्यक्तित्वका रूपमा सहभागी गराएका थिए ।
मेयर भण्डारी र थापासँगको छलफलपछि राई सहितको टोली तत्कालै जाहेरीकर्ता खनालको खाजा घर तर्फ दौडिएका थिए ।
पीडितले मागे जति रकम दिलाई मिलापत्र गरी मुद्दा फिर्ता लिने प्रस्ताव गरेको विषय लिएर आएको जानकारी राईले खनाललाई गराएपछि जाहेरीकर्ता खनालले कानुनी उपचारमा अघि बढिसकेकाले आफू कुनै पनि प्रस्ताव स्वीकार गर्ने अवस्थामा नरहेको जनाएकी थिइन् । मेयर भण्डारी र वडाध्यक्ष थापाको प्रस्ताव बोकेर राईसँग गएको टोलीलाई जाहेरीकर्ता खनालले मलाई यत्रो पिडा पर्दा,हुलाकबाट पठाएको जाहेरी प्रहरीले दर्ता नगर्दा र घोपा क्याम्पमा पुनः अप्रेसन गर्दा चाहिँ कहाँ हराउनुभएको थियो ? भन्ने प्रश्न गरेकी थिइन् । अहिले आएर के कति कारणले मेयर भण्डारी र वडाध्यक्ष थापाको प्रस्ताव लिएर यहाँ आउनुभयो भनी सातो खाएपछि राईसहितको टोली रातको करिब साढे सात बजे खनालको खाजा घरबाट हिँडेका थिए ।
भण्डारी र थापाको प्रस्ताव बोकेर हिँडेमा आफुहरुपनि समस्या पर्ने देखेपछि राईसहितको टोली पछि हटेको थियो । थापासँगमात्र नभई जिल्ला प्रहरी कार्यालय सुनसरीका प्रमुख एसपी तिम्सिना र उनको निर्देशनमा इलाका प्रहरी कार्यालय पकलीका प्रमुख लेखनाथ दाहालको कार्यशैलीमाथि नै विभागमा कुरा उठी विभागीय कारबाहीसम्म हुने स्थितिमा सवारी दुर्घटना पुगेको राम्रोसँग बुझेपछि राईले थापालाई फोन गरेर आफूहरूबाट पार नलाग्ने भएको जानकारी गराएका थिए ।
पूर्व वडा सदस्य समेत रहेका राईले जाहेरीकर्ता खनालकै आग्रहमा उपचार खर्च नदिएको विषयमा वडाध्यक्ष थापालाई फोन गरेको दाबी गरे । राईले भने—‘असल नियतले नै भोजपुर एउटै गाउँकी चेली भएकाले समन्वयकारी भूमिका निर्वाह गर्न मात्र खोजेको थिए । तर विकसित सबै घटना विवरण सुनेपछि कसो म पनि फसिन छु भन्ने लाग्यो र तत्काल पछि हट्ने काम गरे । यसमा मेरो कुनै स्वार्थ थिएन ।’
पक्राउ पुर्जीको २४ दिनमा घाइते फकाउन घरै पुग्यो प्रहरी
वडाध्यक्ष थापाले चलाएको बा २१ च ६८८८ नम्बरको कारको ठक्करबाट गम्भीर घाइते भएकी देवीका खनाललाई भेट्न जिल्ला प्रहरी प्रमुख एसपी तिम्सिनाकै निर्देशनमा बिहीबार(हिजो) इलाका प्रहरी कार्यालय पलकीका प्रहरी निरीक्षक लेखनाथ दाहाल उनको घरै पुगेका थिए ।
मोरङको सुन्दरहरैंचा ७ मा आमा घरमा अशक्त अवस्थामा रहेकी देवीकालाई भेट्न गएका दाहालले देवीको फोटो खिचेका थिए । एसपीसाथ ,म र प्रहरी तपाईँहरूकै साथमा छ । हामीलाई नकारात्मक नसोचिदिनुहोला । हालसम्म उपचार खर्च के कति लाग्यो ? सबै हिसाब किताब राख्नुहोला । हामी दिलाईदिन्छौं भन्दै अशक्त देवीका र जाहेरीकर्ता देवीकाकी दिदी गीतालाई फकाउने प्रयास गरेका थिए । यसरी फकाउन गएका दाहालले नै दुर्घटनाबाट शरीर नै अङ्गभङ्ग हुने गरी गम्भीर घाइते भएकी देवीकाको उपचारका बेवास्ता गरेका वडाध्यक्ष थापा विरुद्ध जाहेरी दरखास्त लिएर जाँदा दर्ता नगरी गीतालाई हप्कीदप्की गरेका थिए । हुलाकमार्फत पठाएको जाहेरी पनि बुझेको ४८ दिनपछि सनाखतका लागि गीतालाई बोलाएका थिए । यतिसम्मकी घाइतेकी दिदी जाहेरीकर्ता गीता प्रहरी कार्यालय पुग्नसाथ सिसिटिभीबाट हेरी ओल्टोकोल्टो पर्ने गरेका थिए ।
प्रहरी निरीक्षक दाहालले बिरामी अवस्था कस्तो रहेछ भन्ने बुझ्न मात्र आफू देवीका बसेको घर पुगेको बताए । उनले यो घटना कानुन बमोजिम नै प्रहरीले अगाडि बढाई सकेको बताए । उनले प्रहरीले खराब नियत, कसैको दबाब र प्रभावमा काम नगरेको दाबी गरे ।
यस्तो थियो घटना
२०८१ साल फागुन २२ गते साँझ साढे ६ बजे चतरा–कान्छी चौक सडक खण्डमा बा २१ च ६८८८ नम्बरको निशान कम्पनीको कारले प्र.१—०२—०४४ प ७४२८ नम्बरको मोटरसाइकललाई ठक्कर दिँदा मोटरसाइकलको पछाडि बस्ने देवीका खनालको दाहिने खुट्टामा गम्भीर चोट लागेको थियो । मोटरसाइकल चालक राजकुमार पौडेल सामान्य घाइते भएका थिए । ठक्कर दिनसाथ वडाध्यक्ष थापा कार लिएर तत्कालै घटनास्थलबाट फरार भएका थिए । देवीकालाई लिफ्ट दिने मोटरसाइकल चालक र स्थानीयको सहयोगमा खनाललाई उपचारका लागि विराट नर्सिङ होम विराटनगरको आकस्मिक कक्षमा भर्ना गरिएको थियो ।
खनालको दाहिने खुट्टाको घुँडामा गहिरो चोट लाग्नुका साथै कम्मर मुनीको भागमा कारको चक्काले पेलेको थियो । विराट नर्सिङ होममा फागुन २४ गते देवीकाको दाहिने खुट्टाको कम्मर मुनिको भागमा अप्रेसन गरी स्टिल हाल्ने काम भएको थियो । खनालको विराट नर्सिङ होमका डाक्टर विजय मेहताले अप्रेसन गरी स्टिल राखेका थिए । अप्रेसन पछि ठक्कर दिने वडाध्यक्ष थापा विरुद्ध कानुनी कारबाहीको माग राखी देवीकाकी दिदी गीता खनालले जाहेरी दरखास्त लिएर दर्ताका लागि इलाका प्रहरी कार्यालय पकली पुगेकी थिइन् ।
इलाका प्रहरी कार्यालय पलकीका प्रहरी निरीक्षक दाहालले निवेदन दर्ता नै नगरी वडाध्यक्षले सबै उपचार बेहोर्ने भनेर आश्वासन दिलाएका थिए ।
अप्रेसनपछि देवीका मोरङको सुन्दरहरैंचा ७ मा रहेको माइती घरमा बसेर घाउको ड्रेसिङ गराउँदै आराम गरिरहेकी थिइन । अप्रेसन गरेको स्थानको घाउ निको हुनका साटो प्रतिदिन पाक्न थालेपछि फलोअपका लागि देवीकालाई विराट नर्सिङ होम नै लगिएको थियो । उनको फलोअपमा डा. सरोज कुमार साहले चेकजाँच गरेका थिए । सो बेला स्टिल लगाएको स्थानमा हड्डी ठिक ठाउँमा लागेको भनेर उनलाई घर पठाइएको थियो ।
तर, झन् घाउ पाक्न थालेपछि प्रहरीलाई अनुनय विनय गरेर घाउ जाँच फारम भरी कोसी अञ्चल अस्पताल विराटनगर चेक जाँचका लागि १६ ज्येष्ठमा बहिनीलाई लगिएको थियो । यतिकासम्म हुँदा वडाध्यक्ष थापा सम्पर्कमा नआएको र सम्पर्कमा आउनका लागि पटक पटक इलाका प्रहरी कार्यालय पकलीमा कुरा राख्दा प्रहरी निरीक्षक दाहालले सुनेको नसुने झैँ गरेका थिए । कार झिक्दा वडाध्यक्ष थापाले गरेको मिलापत्र अनुसार बिरामीको उपचारमा ध्यान नदिएकाले अब कुनै पनि हालतमा जाहेरी दरखास्त दर्ता गर्नु पर्छ भनी प्रहरी कार्यालय पुगेर प्रहरी निरीक्षक दाहाललाई आग्रह गर्दा दाहालले उल्टै हप्कीदप्की गरेका थिए ।
कोसी अञ्चल अस्पतालको डाक्टरले चेकजाँच गर्दा देवीकाको अप्रेसन गरी स्टिल हाल्दा नै डाक्टरले गलत गरेको भनिएको थियो । विराट नर्सिङ होमका डाक्टरले अप्रेसन गरी स्टिल हाल्दा उल्टो हालिएकाले इन्फेक्सन भएको रिपोट सहित पुनः अप्रेसन गर्नुपर्ने सुझाव दिइएको थियो । कोसीको डाक्टरले घाउ जाँचको रिपोट सहित पुनः अप्रेसनका लागि धरानको बिपी कोइराला स्वास्थ्य विज्ञान प्रतिष्ठान रेफर गरेका थिए ।
पछि असार २२ गते बिपीमा देवीकाको दोस्रो पटक अप्रेसन गरी स्टिललाई मिलाउने काम गरिएको थियो । अप्रेसनको नेतृत्व हालका भिसी विक्रम श्रेष्ठले गरेका थिए ।
वडाध्यक्ष थापालाई ३ देखि १० वर्षसम्म कैद हुन सक्ने
सवारी तथा यातायात व्यवस्था ऐन २०४९ को दफा १६२ को (१) मा शरीर अङ्गभङ्गको मुद्दामा सवारी चालकलाई ३ देखि १० वर्ष कैद सजाय तोकिएको सुनसरीका अधिवक्ता वसन्त सुवेदीले बताए । दुर्घटना वडाध्यक्ष थापाले नै चलाएको कारले गराएकाले उनलाई कानुन भएको व्यवस्था अनुसार नै सजाय हुन सक्ने अधिवक्ता सुवेदीले बताए । उनले शरीर अङ्गभङ्गको मुद्दा फौजदारी मुद्दा भएकोले मुद्दा परेपछि सार्वजनिक पद धारण गरेको व्यक्ति कानुनअनुसार स्वतः निलम्बन हुने समेत बताए । उनले यस खालको मुद्दाको हदम्याद एक वर्षसम्म हुने बताए ।
उनका अनुसार दुर्घटनाबाट अङ्गभङ्ग हुने गरी घाइते भएकी देवीकाको तर्फबाट दिदी गीताले हुलाकमार्फत पठाएको जाहेरी समेत दर्ता नगरेको विषयमा उच्च अदालतले कारण सहित जवाफ मागेपछि उच्चको आदेश पत्र बुझ्नुअघि नै पक्राउका लागि १६ श्रावणमा मुद्दा दर्ता गरेको पाइएको छ । २० श्रावणमा पक्राउ पुर्जी जारी भएको थियो तर वडाध्यक्ष थापाले भदौ ८ गतेसम्म कार्यालयको कामकाज गरी ९ गतेदेखि वडा सदस्य कृष्णकुमार श्रेष्ठलाई कार्यवाहक तोकेर काठमाडौँ तर्फ हिँडेको बुझिएको छ ।
बचाईदिनुभन्दै शक्तिकेन्द्र धाउँदै थापा
प्रहरीकै सेटिङमा भगाइएका थापाले आफूलाई बचाई दिन अनुरोध गर्दै नेपाली काँग्रेसका उच्च तहका नेताहरू भेट गरेका छन् । दुर्घटना भएका दिनबाट काँग्रेसका महामन्त्री गगन थापासँग नाता रहेको जनाउँदै पीडितलाई धम्की दिने थापाले उनै महामन्त्री थापा,गृहमन्त्री रमेश लेखक र सहरी विकास मन्त्री प्रकाशमान श्रेष्ठलाई भेट गरिसकेका छन् । उनले बचाई दिन अनुरोध गरेपछि दुई मन्त्रीबाट सकारात्मक प्रतिक्रिया पाएपछि उनी एक हिसाबले ढुक्क भएको बुझिएको छ ।
वडाध्यक्ष थापा उम्कन सक्दैनन्,पक्राउ परिहाल्छन्: एसपी तिम्सिना
जिल्ला प्रहरी कार्यालय सुनसरीका प्रहरी प्रमुख एसपी सुमनराज तिम्सिनाले एउटी महिला पीडित भएकी छन् ,उनलाई न्याय दिलाउन प्रहरी कानुन अनुसार लागिपरेको बताए । एसपी तिम्सिनाले भने —कसैलाई अन्याय गर्नु हुन्न भन्नेमा प्रहरी प्रतिबद्ध छ । केही समयभित्रै वडाध्यक्ष प्रहरी नियन्त्रणमा आउँछन् । उनलाई कानुन अनुसार कारबाही गर्न कसैले रोक्न सक्दैन ।’
उनले पक्राउ पुर्जी जारी भएपछि वडाध्यक्ष थापा र मेयर भण्डारीलाई नभेटेको बताए । उनले प्रहरीकै सेटिङमा थापालाई भगाएको भन्ने आरोप निराधार भएको दाबी गरे । एसपी तिम्सिनाले भने—भन्नेले त जे पनि भन्छ,तर म पीडित महिलालाई न्याय दिलाई वडाध्यक्ष थापालाई कानुनी कारबाही गराउनमा लागिपरेको कुरा चाहिँ सत्य हो ।’
उनले पीडितलाई न्याय दिलाउनकै लागि कागजातहरू दर्बिलो बनाउन आफ्नै निर्देशनमा बिहीबार(हिजो) अशक्त देवीकालाई उनी बसेकै घर पठाएको बताए । अवस्था बुझेर कुनै कमीकमजोरी नगरी दह्रो कागजात निर्माण गर्न निर्देशन दिएको र हिजोबाटै प्रहरी निरीक्षक दाहाल पनि लागिसकेको एसपी तिम्सिनाको भनाई छ ।
एसपी तिम्सिनाले हालसम्म पीडितलाई वडाध्यक्ष थापाले नभेटेका कारण विश्वासको वातावरण नबनेकाले यस्तो समस्या आएको बताए । पीडितलाई भेटेर उनको उपचारमा ध्यान दिएको भए परिस्थिति अर्कै हुने उनले बताए । उनले भने—भागेर शक्तिकेन्द्र धाउँदैमा पक्राउ नपर्ने भन्ने हुँदैन ,सम्पर्कमा आउन भनेका छौँ । आएनन् भने जसरीभएपनि केही समय भित्रनै थापालाई पक्राउ गरेरै छाड्छौँ ।’
