धरानः धरान–१० स्थित प्राइम भिजन इन्स्टिच्युट अफ होटल म्यानेजमेन्टले सामुदायिक विद्यालयका विद्यार्थीलाई शैक्षिक सामग्री वितरण गर्दै पहिलो वार्षिकोत्सव मनाएको छ ।

धरान–१५ स्थित खोरिया बस्तीमा अवस्थित जनता आधारभूत विद्यालयका बालबालिकालाई कलम, कपी वितरण गरिएको इन्स्टिच्युटका प्राचार्य सुमिर मास्केले बताए । विद्यालयका प्रधानाध्यापक काजीबहादुर लामालाई शैक्षिक सामग्री हस्तान्तरण गरिएको थियो ।

शैक्षिक सामग्री वितरण समारोहमा विद्यालयका प्रधानाध्यापक लामाले इन्स्टिच्युटका सञ्चालक, शिक्षक र विद्यार्थीलाई स्वागत गरेका थिए । जनता आधारभूत विद्यालयमा ८० जना विद्यार्थी अध्ययनरत छन् ।

सामग्री वितरण कार्यक्रममा इन्स्टिच्युटका अपरेशन म्यानेजर अभिषेक श्रेष्ठ, सञ्चालक एलोन श्रेष्ठ, सुमन श्रेष्ठलगायतको उपस्थिति रहेको थियो । कार्यक्रममा सेभ द ह्युमानिटी नामक संस्थाको समेत सहयोग रहेको थियो ।