इटहरीः क्वीज मेनिया सिजन ७ वल्र्डवाइड नामक हाजिरीजवाफको रियालिटी शोमा सुनसरीबाट विष्णु मेमोरियल कलेज छनोट भएको छ । शुक्रबार महानायक राजेश हमालको सञ्चालनमा भएको अडिसनमा सहभागी १३ कलेजमध्ये सुनसरीबाट विष्णु मेमोरियल कलेज मात्रै छनोट भएको क्वीज मेनियाका विपिन कार्कीले बताए ।

कार्कीका अनुसार कान्तिपुर टेलिभिजनमा राजेश हमालले सञ्चालन गर्ने क्वीज मेनियाको सातौँ सिजनको लागि भएको राष्ट्रिय अडिसन विष्णु मेमोरियलले पार गरेको हो ।

एक्रेटिभ मिडियाको आयोजनामा हुने हाजिरीजवाफको रियालिटी शोमा नेपालबाहेक विश्वका विभिन्न २५ देशका विद्यार्थी सहभागी हुने आयोजक कार्कीले बताए । कक्षा ११ र १२ का विद्यार्थीलाई लक्षित गरेर सञ्चालन हुने क्वीज मेनिया सिजन ७ वल्र्ड वाइडको राष्ट्रिय अडिसन सकिएपछि कान्तिपुर टेलिभिजनमा प्रशारण हुने कार्कीले बताए ।