पथरीः निजी तथा आवासीय विद्यालय अर्गनाइजेसन नेपाल (प्याब्सन) को पथरीशनिश्चरे नगर कार्यसमितिको आयोजनामा नगरस्तरीय अन्तरविद्यालय वक्तृत्वकला तथा चित्रकला प्रतियोगिता सम्पन्न भएको छ ।

प्याब्सन केन्द्रीय कार्यसमिति सदस्य लेखनाथ भट्टराईको प्रमुख आतिथ्यमा भएको वक्तृत्वकला प्रतियोगितामा स्थानीय न्यु पेगोडा आवासीय माविका युगलकिशोर अधिकारी पहिलो भएका थिए ।

यस्तै सिनियर चित्रकला प्रतियोगितामा मोरङ मेरिगोल्ड अङ्ग्रेजी स्कुलका सन्देश राई र जुनियर चित्रकला प्रतियोगितामा वाल्मीकि मेमोरियल आवासीय माविका मनिष खत्री पहिलो भएको आयोजक समितिका संयोजक खड्गबहादुर श्रेष्ठले जानकारी दिए ।

वक्तृत्वकला प्रतियोगितामा अन्नपूर्ण माविकी सुप्रिया खड्का दोस्रो र बालजागरण विद्या मन्दिरका सिर्जन घिमिरे तेस्रो भए भने रेडस्टार माविकी सभ्या राईले सान्त्वना स्थान हात पारिन् ।

यस्तै, सिनियर चित्रकला प्रतियोगितामा भूपू सैनिक स्कुलका विपिन श्रेष्ठ दोस्रो, अन्नपूर्णका डेनिस धिमाल तेस्रो र एभरेस्ट स्कुलका वीरेन गुरुङले सान्त्वना पुरस्कार हात पारे । जुनियरतर्फ एभरेस्टकी स्नेहा बनेम दोस्रो र कञ्चनजङ्घा स्कुलका रुपेश श्रेष्ठ तेस्रो भए ।

कार्यक्रम पथरी नगर कमिटीका सचिव सुरेन्द्र लिम्बूको सभापतित्वमा सम्पन्न भएको थियो । कार्यक्रममा वक्तृत्वकलातर्फ ९, चित्रकला सिनियरमा १४ र जुनियरमा ११ ओटा विद्यालय सहभागी थिए ।