काँकरभिट्टाः ५३ औँ अन्तर्राष्ट्रिय साक्षरता तथा ४० औं राष्ट्रिय शिक्षा दिवसको अवसर पारेर मेचीनगर नगरपालिकाको शिक्षा शाखाले सोमबार सय जनाभन्दा बढी शिक्षक र विद्यार्थीलाई एउटै मञ्चमा सम्मान तथा पुरस्कृत गरेको छ । धुलाबारीस्थित पासाङ ल्हामु स्मृति जेसीज प्रतिष्ठानमा प्रदेश सभा सदस्य श्रीप्रसाद मैनालीको प्रमुख आतिथ्यतामा कार्यक्रम सम्पन्न भएको थियो ।
नगर प्रमुख विमल आचार्यको सभापतित्वमा भएको शिक्षक विद्यार्थी सम्मान कार्यक्रममा कक्षा ८ को परीक्षामा सर्वाेत्कृष्ट अङ्क ल्याउने सामुदायिक विद्यालयतर्फका ५ र संस्थागत विद्यलायतर्फका ४ जना, एसईई परीक्षामा सर्वाेत्कृष्ट अङ्क ल्याउने सामुदायिक विद्यालयतर्फका ४ र संस्थागत विद्यलायतर्फका २ जना विद्यार्थी पुरस्कृत भएका हुन् । त्यस्तै, उत्कृष्ट विद्यालय व्यवस्थापन समिति अध्यक्ष, प्रधानाध्यापक, कर्मचारी, बालशिक्षकतर्फ एक÷एक गरी ४ जना तथा प्याब्सनतर्फका ४ जना र एन प्याब्सनतर्फका ३ जना व्यवस्थापकलाई पुरस्कृत गरिएको हो ।
यसैगरी सेवा निवृत्त भएका ४० तथा अनिवार्य अवकाशतर्फका ४८ गरी कुल ८८ जना शिक्षकलाई समेत सम्मान गरिएको थियो । प्रमुख अतिथि प्रदेश सभा सदस्य मैनाली, नगरप्रमुख आचार्य, विशिष्ट अतिथि नगरप्रमुख मीना पोखरेल उप्रेती, नेपाल प्रज्ञा प्रतिष्ठानका प्राज्ञ सदस्य सुभद्रा भट्टराई अर्यालले शुभकामना मन्तव्यसहित सम्मानित तथा पुस्कृत व्यक्तित्वलाई अविर, टीका दोसल्लासहित सम्मान पत्र र पुरस्कार प्रदान गरेका थिए ।
कार्यक्रममा निजी विद्यलायका तर्फबाट मेचीनगर प्याब्सन अध्यक्ष डम्बर रुचालले बोलेका थिए । कार्यक्रममा विभिन्न जातजातिको कला, संस्कृति तथा रीतिरिवाज झल्किने गीतमा विद्यार्थीले नृत्य गरेका थिए । शिक्षा शाखा प्रमुख होम भण्डारीले सञ्चालन गरेको कार्यक्रममा शाखा सदस्य सुरेन्द्र उप्रेतीले स्वागत गरेका थिए ।
