विराटचोकः सुन्दरहरैंचा नगरपालिकाको आयोजना तथा पाथीभरा सीप विकास तालीम केन्द्रको संयोजनमा शुरु भएको तालीमको सुन्दरहरैंचा नगरपालिकाकी उपमेयर धनमाया तामाङले उद्घाटन गरिन् ।
तालीम उद्घाटन कार्यक्रमलाई सम्बोधन गर्दै उपमेयर तामाङले हरेक क्षेत्रमा प्रविधिको आवश्यकता परेको समयमा घरमै बसी तालीम लिन पाउनु खुशीको कुरा भएको बताइन् । सिकेको सीपको सही उपयोग गर्न उनले प्रशिक्षार्थीलाई सुझाव दिइन् । महिलालक्षित तालीमको दुरुपयोग रोक्न सचेत हुनुपर्ने बेला आएको उनको भनाइ थियो ।
सुन्दरहरैंचा नगरपालिकाको वडा नम्बर १२ का अध्यक्ष रोशनप्रसाद ढकालले यस्ता तालीमको आयोजना गर्नु भनेको नाटक गर्नु हो भन्ने आवाज उठ्न थालेकाले त्यस्तो आवाजलाई चिर्न सही व्यक्तिलाई तालीम दिनुपर्ने र प्रशिक्षार्थीले सही तरिकाले तालीम लिनुपर्ने बताए । कसैले तालीम छोड्नुपर्ने भएमा त्यसको कारणसहित लिखित निवेदन दिनुपर्ने व्यवस्था गर्न उनले सहयोगी संस्थालाई सुझाव दिए ।
सुन्दरहरैंचा नगरपालिकाको वडा नम्बर १२ का सचिव अनिल पोखरेलले निःशुल्क दिइएको तालीम भनेपछि कम महत्व दिने प्रवृत्तिको अन्त्य हुनुपर्ने बताए । सरकारी मात्रै नभई निजी कम्पनी र व्यवसाय गर्न पनि प्रविधिको आवश्यक अनिवार्य हुन थालेकाले सबै व्यक्ति प्रविधिमैत्री हुनुपर्ने उनको भनाइ थियो ।
कार्यक्रमलाई सम्बोधन गर्दै उद्घाटन समारोहकी अध्यक्ष एवम् सुन्दरहरैंचा नगरपालिकाको महिला तथा बालबालिका शाखा प्रमुख सुशीला अधिकारीले प्रशिक्षार्थीले बीचैमा तालीम छाड्नु भनेको अरुको अधिकारको हनन गर्नु हो भन्ने बुझ्नुपर्ने बताइन् ।
कार्यक्रममा प्रशिक्षक विवेक घिमिरे, सहयोगी संस्थाकी प्रबन्धक कल्पना अर्याल, वडा नम्बर १२ को मेलमिलाप केन्द्रका गुरुप्रसाद अधिकारी र मोहनप्रसाद ढकाल उपस्थित थिए । त्यस्तै, वडा नम्बर १२ का सदस्य गणेशप्रसाद फुयाल, डिल्लीप्रसाद दाहाल, प्रमिला अछामी पनि कार्यक्रममा उपस्थित थिए ।
तीन महिने सो तालीममा सुन्दरहरैंचा नगरपालिकाका सबै वडाबाट प्रशिक्षार्थी छानिएको नगरपालिकाले जनाएको छ ।
_1720278409.jpg)
