बिराटनगरः ज्वरो आएका बिरामीलाईसमेत अस्पतालहरुले लिन नमानिरहेका बेला बिराटनगर स्थित नोबेल शिक्षण अस्पतालका सञ्चालक डा.सुनिल शर्माले कोरोना लागेकासहित सबै किसिमका बिरामीको उपचार गर्न नोबेल अस्पताल तयार रहेको बताएका छन् ।
कतिपय व्यक्तिले उपचार गर्न नमानेको भनेर अफवाह फैलाएको भन्दै उनले नोबेल अस्पताल जस्तोसुकै समस्याको पनि उपचार गर्न २४ सै घण्टा तयार रहेको बताएका हुन् । जुनसुकै समस्या भएका बिरामीको उपचारमा पनि नोबेल अस्पताल पछि नहट्ने भन्दै उनले सामाजिक सञ्जाल मार्फत पनि सन्देश दिएका छन् । नोबेलमा कोरोनाका संभावित बिरामी र अन्य समस्याका बिरामीको उपचारका लागि छुट्टा–छुट्टै उपचार कक्ष पनि निर्माण गरिएको छ ।
‘हामीले ५० शैयाको आइसोलेसन, ५ वटा भेण्टिलेटरसहितको १० शैयाको आइसोलेसन सघन उपचार कक्ष र २ वटा डेडिकेटेड डायलाईसिस मेसिनसहितको आइसोलेटेड डाइलाईसिससमेतको व्यवस्था गरेका छौ ।’ डा.शर्माले भने ‘अफवाह फैलाउँनेको भ्रममा नपर्नुहोस् । हामी जस्तासुकै बिरामीको उपचारमा सधै प्रतिवद्ध छौ ।’ नोबेलमा कोरोनाका बिरामीको उपचारका लागि दुई सय बेडको आइसोलेसन वार्ड पनि तयारी अवस्थामा राखिएको डा.शर्माले जानकारी दिए ।
कोरोनाका र अन्य बिरामीका लागि यत्ति धेरै बेडको बेग्ला बेग्लै उपचार कक्ष निर्माण गर्ने नोबेल निजी क्षेत्रबाट सञ्चालित नेपालकै पहिलो अस्पताल हो । ७१ वटा भेन्टिलेटरसहित ७ सय ६४ शैया रहेको नोबेल निजी क्षेत्रबाट सञ्चालित पूर्वी नेपालको सबैभन्दा ठूलो अस्पताल पनि हो । \
‘अहिले सरकारको मुख ताक्ने बेला हैन, सकेको सहयोग गर्न तयार छौ’
कोरोनाबिरुद्ध सरकारले अवलम्बन गरेको अभियानमा साथ दिन आफुले सकेको जस्तोसुकै सहयोग गर्न पनि तयार रहेको डा.शर्माले बताएका छन् । ‘अहिले सरकारको मुख ताकेर मात्र बस्ने बेला हैन, सवैले सकेको भूमिका खेल्नुपर्छ । हाम्रो क्षेत्रबाट सक्दो सहयोग गर्न तयार छौ ।’ उनले भने ।
कोरोनाले निम्त्याएको संकटले सम्पूर्ण नागरिकलाई प्रभावित पारेकाले सवैको भलाइका लागि सहयोग गर्न आफु तयार रहेको डा.शर्माको भनाई छ । यसअघि डा.शर्माले नोबेल अस्पताललाई कोरोना उपचार केन्द्र बनाउँन दिन तयार रहेको घोषणा गर्दै सरकारलाई लिखित पत्रसमेत पठाएर छलफलका लागि आग्रह गरेका थिए ।
उनले पूर्वी नेपालमै पहिलो पटक नोबेल अस्पतालमा उपचारमा खटिने सवै स्वास्थ्यकर्मीलाई पीपीईको व्यवस्था पनि मिलाएका छन् । अहिले कोरोनाका र अन्य बिरामीलाई छुट्टा छुट्टै स्तरीय उपचार कक्ष निर्माण गरिएको हो ।
_1720278409.jpg)
