दशै नजिकिएसँगै खसीबोकाको किनबेच बढ्न थाल्यो (फोटो फिचर)

धरानः दशैं नजिकिँदै गर्दा बजारमा खसीबोकाको किनबेच बढ्न थालेकोे छ । दशैंमा खसीबोका बढी खपत हुने हुँदा किनबेच बढ्न थालेको हो । धरान–१३ स्थित कृषि उपज बजार स्थलको पशुहाटमा शुक्रबार खसीबोका किनबेच गर्नेको भीड थियो । हरेक शुक्रबार पशुहाट लाग्ने अमरहाटमा आउँदो शुक्रबार धेरै व्यापार हुने व्यापारी बताउँछन् ।
सो कृषि बजार स्थलमा धनकुटा, भोजपुर, सङ्खुवासभा, तेह्रथुमबाट खसीबोका बिक्रीका लागि ल्याइएको थियो । १० हजारदेखि ४० हजारसम्मका खसीबोका बिक्रीका लागि ल्याइएको थियो । व्यापारी र उपभोक्तालाई किनबेच गर्न भ्याइनभ्याइ थियो । खसीबोकाको मूल्य खासै नपाएको व्यापारीहरूले बताए ।
गत हप्तादेखि नै बजारमा किनबेच गर्ने भीड लागेको कृषि उपज बजार स्थलका व्यवस्थापक लक्ष्मण भट्टराईले बताए । पाल्न झन्झट हुने हुनाले बजारका मानिसहरूले अलि पछि नै खसीबोका लाने हुनाले अब क्रमशः बिक्री बढ्ने उनले बताए । अघिल्लो हप्ता करिब ८ सय खसीबोका खरिदबिक्री भएको उनले बताए । यस पटक करिब १ करोडको कारोबार गर्ने लक्ष्य रहेको कृषि उपज बजारले जनाएको छ ।
शब्द र तस्बिरः वसन्त वान्तवा