रिकिविकः आइसल्याण्डको राजधानी रिकिविकको दक्षिण–पश्चिमी क्षेत्रको ज्वालामुखी विस्फोट भएको छ ।
आइसल्याण्डको मौसम विभागका अनुसार रिकिन्स प्रायद्विपको फाग्राडाल्स्फलमा ज्वालामुखी विस्फोट भएको बीबीसीले जनाएको छ । ठूला पत्थर तथा ढुंगाहरु आउन सक्ने तथा पहिरो समेत जान सक्ने भन्दै स्थानीय बासिन्दालाई सचेत पारिएको छ । पछिल्लो तीन हप्तामा सो क्षेत्रमा ५० हजार भन्दा धेरै भूकम्प गएको थियो । अहिले सो क्षेत्रमा ज्वालामुखी विस्फोट भएको हो । सन् २०१० मा आइसल्याण्डमै भएको ज्वालामुखी बिस्फोटका कारण युरोपको हवाई ट्राफिक प्रभावित भएको थियो । तर यसपटकको फाग्राडाल्स्फल ज्वालामुखीबाट ठूलो मात्रामा खरानी तथा धुवाँ ननिस्कने अनुमान छ ।
वेम्याम्स तथा स्याटेलाइट तस्बिरहरु मार्फत हिजो बेलुकादेखि ज्वालामुखी विस्फोट भएको पुष्टि भएको आइसल्याण्डको मौसम विभागले बताएको छ । ज्वालामुखी विस्फोट भएको क्षेत्र राजधानीबाट ३० किलोमिटर पर पर्छ । सर्वेका लागि सो क्षेत्रमा कोस्टगार्ड हेलिकप्टर पठाइएको छ । सो टोलीले पठाएको पहिलो तस्बिरमा लाभा ओरालो झर्दै गरेको देखिन्छ । -एजेन्सी
_1720278409.jpg)
