वडाध्यक्ष भट्टराई भन्छन्, ‘आँखाको ज्योति गुमेपछि हृदयको ज्योति खुल्यो’

  • कार्तिक १४, २०७५
  • ३९० पटक पढिएको
  • विनय बाह्रकोटी
alt

इटहरी: इटहरी उपमहानगरपालिकामा नेपालकै एक मात्र यस्ता वडाध्यक्ष छन् जो आँखा देख्दैनन् । तर उनी आँखा देख्नेभन्दा कम सक्रिय भने छैनन् ।

२०६२/ ६३ सालमा भएको जनआन्दोलनको इटहरीबाट नेतृत्व गरेका चन्द्रप्रसाद भट्टराई अहिले वडाको नेतृत्व गरिरहेका छन् ।  २०६४ सालदेखि उनको आँखामा सामान्य समस्या देखा पर्न थाल्यो । उपचारको लागि नेपालका प्रायः सबै अस्पताल र भारतको सिलगुढीसम्म पुगे उनी । अधबैंसे उमेरमै यस्तो समस्या आएपछि उनको जीवनमा बज्रपात प¥यो । कतै पनि उपचार हुन नसकेपछि मनमा धेरै बेचैन भएको उनी सुनाउँछन् ।

‘बिस्तारै आँखा धमिलो हुन थाल्यो । लगभग २ वर्षको अन्तरालमा आँखा देख्न नसक्ने भएँ,’ उनी भन्छन्, ‘डाक्टरले यसको उपचार कहीँ हुँदैन भनेपछि जीवन बेकार रहेछ भन्ने भयो ।’ तर त्यो दिन आँखामात्र बन्द भएको रहेछ, खास जीवन त भर्खर शुरु भएको रहेछ भन्ने लाग्ने गरेको उनी सुनाउँछन् ।

२०२३ सालमा तत्कालीन महेन्द्रनगर गाउँपञ्चायतमा जन्मिएका हुन् भट्टराई । स्नातकसम्मको औपचारिक अध्ययन पूरा गरेका उनी पूर्व शिक्षक पनि हुन् । आइएसम्मको अध्ययन सकेर २०४२ सालमा भोजपुरको एक माध्यमिक विद्यालयमा शिक्षकको रूपमा जागिर खान गए उनी । त्यहाँ पञ्चायतको चेपुवामा परे । समस्यामा परेपछि उनी रातारात भागेर इटहरी आए । त्यसपछि स्नातक तह अध्ययन गर्न काठमाडांैमै छिरे । त्यही समयमा गलैँचा उद्योग सञ्चालन गरेको अनुभव उनी सुनाउँछन् । ३ जना मिलेर ५० लाख लगानी गरेको तरपछि जर्मन सरकारले गलैँचा किन्न बन्द गरेपछि उद्योग बन्द गर्नुपरेको उनको अनुभव छ । 

भर्खरै स्नातक सकेका थिए । इटहरी पनि गाविसबाट भर्खरै नगरपालिका घोषित भएको थियो । उनी इटहरी फर्किए र नगरपालिकाले कर सङ्कलन गर्न राखेको ढाटमा काम गर्न थाले । पछि नगरपालिकाले नगरपालिकाबाट समाचार भन्ने कार्यक्रम ल्यायो । जहाँ दैनिक रूपमा घटना र सूचना भन्नुपर्ने थियो । करिब १ वर्ष जति उनले त्यसैमा काम गरेपछि उक्त कार्यक्रम बन्द भयो ।
महेन्द्र मोरङमा आइए पढ्दा अनेरास्ववियुको प्रा.क सदस्य भएका उनी गाउँपञ्चायतको सदस्य हुँदै युवा सङ्घको केन्द्रीय कार्यकारी सदस्यसम्म भए । विद्यार्थी राजनीति गर्ने खासै मौका नपाएका उनी एमालेले ल्याएको टोलसुधार कार्यक्रमबाट मूल पार्टीको राजनीतिमा समावेश भए । टोल सुधार समितिका सचिव, पार्टीको वडा कमिटीको सचिव, नगर र जिल्ला हुँदै उनी अहिले प्रदेश नम्बर १ को सल्लाहकार भएका छन् ।
कम्युनिष्ट विचारको प्रगतिशीलता उनको व्यवहारमा पनि देखिन्छ । नेपाली समाजमा अझैसम्म पनि पितृसत्तात्क सोच हाबी भएकै पाइन्छ । धेरैले छोरा जन्माउनको लागि दोस्रो विवाह गर्ने सम्मको हर्कत गरिरहेका छन् ।

उनलाई भने सन्तान छोरा नै हुनुपर्छ भन्ने कुनै महत्वकांक्षा भएन । त्यसैले दुई छोरीको जन्मपछि उनले सन्तानमोह नै त्यागिदिए ।  परिवारको प्रमुख आयस्रोत भनेकै उनकी श्रीमती हुन् । उनी स्थानीय एक विद्यालयकी शिक्षिका हुन । त्यसैबाट उनको गुजारा चलेको छ ।
राजनीति गर्ने मान्छे सधैँ सकारात्मक सोच भएको हुनुपर्छ भन्छन् भट्टराई । ‘पार्टीभित्र एकले अर्काको अस्तित्व स्वीकारै नगर्ने प्रचलन छ । जुन हिजो पनि थियो आज पनि छ भोलि पनि रहन्छ भन्ने मेरो ठहर छ’, उनी भन्छन् , ‘सबैभन्दा ठूलो समस्या भनेको नकारात्मक सोच नै हो ।’
‘जीवनको भोगाइ र गराइबाट बिस्तारै सफलता हासिल हुँदै जाने कुरामा उनी विश्वस्त छन् । कहिलेकाहीँ आफूले सुन्ने गरी र कहिले नसुन्ने गरी पनि आफ्नो शारीरिक कमजोरीको नकारात्मक चर्चा पार्टीभित्र हुने गरेको पाएको छु, ‘उनी भन्छन्, ‘तर त्यसले मलाई कुनै लघुताभाष हुँदैन । बरु साथीहरू मभन्दा अझै कमजोर रहेछन् भन्ने लाग्छ । जसले मलाई थप ऊर्जाशील बनाइरहेको छ ।’

chandra bhattrai (4) copy

‘म इटहरी नगर कमिटी अध्यक्षको उम्मेद्वार थिएँ’, उनी भन्छन्, ‘विपक्षी खेमाबाट अन्धोलाई जितायो भने भोलि पार्टी बर्बाद हुन्छ यसले पार्टी हाँक्न सक्दैन भन्ने हौवा फैलाइयो ।’ त्यसमा म ११ मतले पराजित भएँ । त्यतिखेर चाहिँ केही नरमाइलो महसुुुस भएको उनी सुनाउँछन् ।
‘पछि स्थानीय तहको निर्वाचनको समय आयो । नगरका सबै वडाको उम्मेद्वार फाइनल भइसक्यो तर वडा नम्बर ४ को मेरै कारण ढिला भइरहेको थियो ।’ उनी भन्छन्, ‘त्यहाँ पनि यसले आँखा देख्दैन । आँखा नदेख्नेले काम गर्न सक्दैन, जित्दा पनि जित्दैन, जिताउन सकिँदैन भनेर अरू आकाङ्क्षी साथीहरूले मुद्दा बनाएछन् । पार्टीको एउटा पक्षका धेरै साथीहरू केन्द्रका नेताहरूसम्म नै चन्द्रप्रसाद भट्टराईलाई टिकट दिनुहुँदैन भन्दै क्याम्पेनिङ गर्दै जानुभयो ।’

तथापि उनले टिकट पाए । हुन त त्यो कुनै आश्चर्यको विषय नभए पनि शारीरिक कमजोरीलाई राजनीतिकरण गर्न खोजिएकोमा उनको चित्त दुखाइ थियो । अरू केही नपाएर आँखा नदेख्ने समस्यालाई नारा बनाउनु लज्जास्पद भएको उनको भनाइ छ ।

chandra bhattrai (3)

पार्टीका नेताले लगाउने आरोपलाई उनी चिर्न चाहन्थे । जसले उनलाई दृष्टिविहीन भने तिनै मान्छेलाई केही गरेर देखाउने पोजेटिभ इगो बस्यो उनको मनमा । त्यही ऊर्जाकै कारण इमानदार भएर काम गर्नुपर्छ भन्ने लागेर आजसम्म इमानदारिता चुक्न नदिएको उनी बताउँछन् ।
जनप्रतिनिधि भएपछि उनको दैनिकी परिवर्तन भएको छ । सखारै उठ्ने, गाउँ घुम्ने, जनताको समस्या भएको ठाउँमा जानेजस्ता काम उनको बिहानको दैनिकीमा पर्छन् । पार्टीको काममा भन्दा पनि जनताको घरदैलोमै भेटिन्छन् प्रायः उनी ।
एक्लै हिँड्न समस्या भएकाले कोही साथी बोलाएर मात्र घरबाट निस्कन्छन् । बोलाएपछि जोकसैले पनि सहयोगमा नाइँनास्ति नगरेको उनी बताउँछन् ।
आँखामा समस्या भएपछि उनलाई मोबाइल हेर्न होस् या बाटो हिँड्न कुनै समस्या भएको छैन । उनलाई प्रायः चिनजानका मानिसको नम्बर एकै पटकमा याद हुन्छ । आफ्नो आँखामा समस्या आउन थालेदेखि, दिमागको सक्रियता बढेको उनी बताउँछन् । ‘दुई वटै आँखा बन्द भए, तर त्योसँगै तेस्रो आँखा खुलेको भान भएको छ,’ उनी भन्छन्, ‘आधा जीवन भौतिक आँखा देखेर बित्यो अबको आधा जीवन हृदयको आँखाले देखेर बित्नेवाला छ । जसले गर्दा आफैँले आफँैलाई भाग्यशाली ठानेको छु ।’

पार्टीका महत्वपूर्ण काममा भन्दा बाहेक उनी पार्टीभित्र त्यति सक्रिय छैनन् । पार्टी राजनीति भनेको सङ्गठन सञ्चालन गर्ने कुरा हो । त्यो पोलिटिकल कन्ससनेसभित्र बसेर काम गर्नुपर्ने हुन्छ । तर जनप्रतिनिधि हुँदा डिप्लोमेटिक कन्ससनेसले काम गर्ने उनको बुझाइ छ ।
पार्टीमा को कुन गुटको कुन पार्टीको भन्ने लेखाजोखा हुन्छ । तर यो बेला कसले भोट हाल्यो कसले हालेन, को कुन खेमाको हो भन्ने कुराको कुनै गुन्जायस नहुने उनको भनाइ छ । कसरी नगरवासीलाई खुशी बनाउन सकिन्छ भन्नेमा नै ध्यान जाने गरेको उनी बताउँछन् ।

१ वर्षे कार्यकालमा धेरै चुनौतीको सामना गर्नुपरेको उनी सुनाउँछन् । वडा नं ४ जनसङ्ख्याको हिसाबले इटहरीको सबैभन्दा ठूलो वडा हो । उनले १ वर्ष भित्रमा बाटो र बत्तीको समस्या समाधान गर्ने योजना बनाएका थिए । जुन योजना सफल भएको उनको भनाइ छ ।
त्यति मात्र होइन उनी वडाध्यक्ष निर्वाचित भएसँगै इटहरीमा विनाशकारी बाढी गयो । जसले ६ जनाको ज्यान लियो । ४ सय ५० भन्दा बढी परिवार घरबारविहीन भए ।

उनी कसैसँग कुरा गर्दा वा हात मिलाउँदा आफू दृष्टिविहीन भएको महसुस हुन दिँदैनन् । उनको हाउभाउ सामान्य मानिसको जस्तै देखिन्छ । तर हस्ताक्षर गर्नुपर्दा भने सचिव अथवा सेवाग्राहीकै सहायतामा गर्छन् ।
हुन त स्थानीय राजनीतिमा उनलाई कूटनीतिक खेलाडीको रूपमा लिइन्छ । हरेक विषयमा अरूको कुरा सुनिसकेपछि मात्र निर्णायक रूपमा बोल्ने बानी उनको छ । नयाँ नयाँ कुराको खोज गर्ने उनको बानी नै परेको छ ।

chandra bhattrai (1)

वडा नं ४ लाई आगामी ४ वर्षभित्रमा सबैभन्दा धेरै स्वरोजगार युवा भएको वडा बनाइने उनको योजना छ । त्यसको शुरुवात केही दिन अगाडि क्रिस्टलका गहना बनाउने तालीम’ बाट शुरु गरिसकिएको उनको भनाइ छ । जहाँ २५ जना महिला सहभागी भएर क्रिस्टलका गहना तथा खेलौना बनाउने तालीम लिएका थिए । कतिपय महिलाले तालीमकै क्रममा ५० हजार रुपैयाँसम्म आम्दानी गरेका थिए ।
यसैगरी हरेक युवा, महिला, गृहणी, ज्येष्ठ नागरिक सबैलाई आर्थिक हिसाबमा जोड्न सकिने उनी बताउँछन् । ‘यो एक वर्षसम्म के गर्न सकिन्छ भनेर अनुसन्धान भएको छ’, उनी भन्छन्, ‘अबको ४ वर्षमा यो वडा नेपालकै नमूना वडा बनाउने सङ्कल्प लिएको छु ।’
कौसी खेतीदेखि सार्वजनिक जग्गा लिजमा लिएर युवा उद्यमशीलता विकास गर्ने सम्मका उनका योजना रहेका छन् । जसमा उपमहानगरले उत्पादन गरेका सामग्री बिक्री गर्ने नयाँ किसिमको ‘इटहरी बजार’ बनाउन सकिने उनी बताउँछन् । जसबाट सस्तो, अर्गानिक र गुणस्तरीय सामग्री पाउन सकिन्छ । यसले गर्दा युवाहरूले रोजगार त पाउने नै भए उपमहानगर पनि स्वावलम्बी हुने उनको तर्क छ ।
पार्टीमा भट्टराईले कहिल्यै कार्यकारी भूमिका निर्वाह गर्ने अवसर नपाए पनि जनताको काममा भने कार्यकारी हुन पाउने सपना साकार भएको छ ।

प्रतिक्रिया दिनुहोस

नगरपालिकाको सहयोगमा ...

गाईघाटः उदयपुरको चौदण्डी गढी नगरपालिकामा बृहत् रूपमा आलु खेती गरिएको छ । नगरपालिकाका विभिन्न वडाका ...

भूकम्प दिवसमा इटहरी ...

इटहरीः इटहरीलाई भूकम्पीय दृष्टिले सुरक्षित शहर बनाउन भवन निर्माण संहितालाई कडाइका साथ कार्यान्वयन गर ...

इँटाभट्टाबाट ६ बालमज ...

विराटनगरः मोरङको कटहरी गाउँपालिकामा सञ्चालित एक इँट्टाभट्टाबाट श्रम गरिरहेका ६ जना बालकको उद्धार गरि ...

इष्ट टुरिजम इभेन्ट म्यानेजमेन्ट एण्ड मिडिया प्रालिद्धारा प्रकाशित

प्रदेश पोर्टल डटकम

इटहरी उपमहानगरपालिका, सुनसरी, कोशी, नेपाल

  • कम्पनी दर्ता नं. १९४७९७/०७५/०७६
  • स्थायी लेखा नं. ६०६६४३६५८
  • सूचना विभाग दर्ता नं. ९३०/०७५–०७६
  • प्रेस काउन्सिल दर्ता नं. १७१/०७५–०७६
  • फोन नं.: +९७७ २५ ५८२६९०
  • मोबाइल नं.: +९७७ ९८४२०३७४०२
  • इमेल: pradeshportal@gmail.com
  • प्रधान सम्पादक: राजेश विद्रोही
  • महाप्रबन्धकः बद्री प्रसाद पोख्रेल (भिखारी)
  • प्रबन्धकः देवान किराती
  • प्रबन्ध सम्पादकः प्रेमप्रसाद बास्तोला
  • सम्पादकः मिलन बुढाथोकी
  • डेस्क सम्पादकः खेमचन्द्र अधिकारी
  • अंग्रेजी डेस्क प्रमुखः विराट अनुपम
  • राजनीतिक/सामाजिक ब्युरोः विनय बाह्रकोटी
  • स्थानीय सरकार/कानुन ब्युरोः कृष्ण बहाब भट्टराई
  • स्वास्थ्य पृष्ठ संयोजकःडा. सुर्यबहादुर पराजुली (एमडी)
  • लोकसेवा पृष्ठ संयोजकः अनिल पोख्रेल (नायब सुब्बा)
  • लेखाः समीक्षा केसी
  • संवाददाताः कविराज घिमिरे, धनकुटा

Copyright © 2018 / 2019 - pradeshportal.com All rights reserved