इटहरीः जुवा खेल्दै गरेको अवस्थामा सुन्दरहरैंचाको विराटचोकबाट १० जना जुवाडे कौडासहित पक्राउ परेका छन् । उनीहरूलाई इलाका प्रहरी कार्यालय बेलबारीको प्रहरी टोलीले पक्राउ गरेको हो ।
इलाका प्रहरी कार्यालय बेलबारीका अनुसार जनककुमार मास्केसहित १० जना पक्राउ परेका हुन् । विराटचोकस्थित गोरखा डिपार्टमेन्ट स्टोरको पछाडि रहेको एक घरबाट बिहीबार राति साढे ११ बजे उनीहरू पक्राउ परेका हुन् ।
एसपी मनोजकुमार केसीका अनुसार पक्राउ परेकाहरूको साथबाट ४ लाख १४ हजार १ सय ५५ रुपैयाँ बरामद भएको छ । पक्राउ परेकाहरूलाई जुवा ऐनअन्तर्गत मुद्दा चलाइने उनले बताए ।
स्थानीयका अनुसार बिहीबार पक्राउ परेको समूहलाई दशैंको समयमा पनि प्रहरीले पक्राउ गरी मुद्दा नचलाई छाडेको थियो । यस विषयमा जानकारी लिँदा एसपी केसीले आफूलाई थाहा नभएको बताए ।
‘पहिले यही टोलीलाई पक्रिएको हो भन्ने मलाई जानकारी छैन,’ फोन सम्पर्कमा केसीले भने, ‘कौडासहित पक्राउ गरेपछि कसैलाई हामीले छोडेका छैनौं र छाड्दैनौं पनि ।’
_1720278409.jpg)
