रौतहटः रौतहटको राजपुरमा भएको भनिएको बम काण्ड प्रकरणको अभियोगमा अहिले पूर्पक्षका लागि कारागारमा रहेका नेपाली कांग्रेसका नेता तथा पूर्वमन्त्री अफताब आलमलाई राजनीतिक प्रतिशोध साँध्न षडयन्त्र रचिएका प्रमाणहरू फेला पर्न थालेका छन्।

०६४ मा रौतहट–२ मा आलमसँग निर्वाचनमा पराजय भोगेका शैलेन्द्र साहले सत्ता र शक्तिको दुरुपयोग गरेको घटनाका विभिन्न कागजातले पुष्टि गर्ने आधार दिएको छ।

त्यसबेला १० हजार मतले पराजित साह आफैं आलमविरुद्ध सरकारी साक्षीका रुपमा प्रस्तुत भएका छन्। जबकि यस प्रकरणमा उनलाई राजनीतिक प्रतिस्पर्धी भएका कारणले स्वार्थ बाझिने हुँदा साक्षीका रुपमा राख्न नै नपाउने कानुनविदहरू बताउँछन्।

यतिमात्र होइन जब एमाले सत्ता र शक्तिमा ०७४ मा आयो साहले राज्यशक्तिको दुरुपयोग गरी जनताबाट निर्वाचित प्रतिनिधि सभा सदस्य आलमविरुद्ध राज्यशक्तिको दुरुपयोग गराए।

जिल्ला अदालत रौतहटमा साक्षीका रुपमा पुगेका अधिकतम व्यक्तिको बयानले पनि यस प्रकरणमा साह पक्षको दबाब रहेको स्पष्ट खुलेको थियो। यहाँसम्मकी जाहेरीकर्ताले समेत त्यहाँ कुनै बम काण्ड नै नभएकोसम्मको बयान अदालतमा दिएका थिए। 

कतिपय साक्षीलाई भने प्रहरीले कस्टडीमा राखेर होस्टाइल गरेको बयान जिल्ला अदालतमा दिइएको थियो। यति मात्र होइन, ०६४ को चैतमा भएको भनिएको घटनामा मारिएका मध्यका पिन्टु भनिने त्रिलोकप्रताप सिंह सोही बर्ष मानब बेचबिखन तथा कर्तव्य ज्यान मुद्दामा फरार अभियुक्त रहेको प्रहरीमा रहेको तत्कालिन रेकर्ड र उपलब्ध जाहेरीले स्पष्ट पारेको छ। 

उनीविरुद्ध ०६४ मंसिरमा नै उजुरी दर्ता भएपछि फरार भएका थिए। जबकि, घटना चैतमा गराइएको भनी मुद्दा पेस गरिएको छ। प्रहरीको कडा निगरानी गरिरहँदा मंसिरमा फरार पिन्टु बमकाण्डमा मारिनका लागि चैतमा नेपाल फर्किएका हुन्? सवाल खडा भएको छ। 

‘फरार अभियुक्तलाई इटा भट्टामा मृत्यु भएको भनी पेस गरियो, यसमा राजनीतिक दुशाग्रह राखियो’, आलमका परिवारले भनेको छ,‘निरन्तर चुनाव जितिरहेको व्यक्तिलाई राजनीतिक प्रतिशोध साँधियो।’

मृतक भनिएका सिंहका परिवारका तर्फबाट उजुरीकर्ताले पनि अदालतमा प्रहरीको दबाबका कारणले उजुरी दिएको बताएका थिए। उनको बयानमा पिन्टु फरार अभियुक्त रहेको स्पष्ट उल्लेख छ।

यति मात्र होइन बमकाण्डमा घाइते भएको भनिएका भारतको सितामढीका गौरीशंकर चमारलाई पनि प्रहरी प्रशासनको दबाबमा नै जबरजस्ती जाहेरी दिन लगाइएको थियो। उनले अदालतमा बयान फेरेको भनी दाबी गरिए पनि उनी घाइते हुनुको फरक प्रमाण फेला परेको छ। चमार स्टोभ पड्किएर नै घाइते भएको र उनको सर्जरी गरिएको भन्नी प्रमाणको किटानी पत्र भारतस्थित अस्पतालले लेखेर नै दिएको छ। 

चमारको २९ सेप्टेम्बर १९९८ देखि १ डिसेम्बर (तीन महिना)सम्म उपचारका लागि भर्ती भएको सीतामढीस्थित सदर अस्पतालले जनाएको छ। उक्त अस्पतालमा अहिले पनि रेकर्ड कायम राखिएको छ। अस्पतालका अनुसार चमारलाई प्राथमिक स्वास्थ्य केन्द्र बैरगनियाँले रेफर गरी पठाएको र तीन महिनापछि पीएमसीएच पटनामा रेफर गरिएको थियो।

०६४ मा कांग्रेसलाई २७ सिटमा खुम्च्याउँदा पनि लोकप्रियताका कारण प्रत्यक्षमा जित निकालेका आलमको राजनीतिक भविष्य नै सिध्याउनका लागि साह परिवारले सत्ता र शक्तिको दुरुपयोग भएको देखिन्छ। 

यस प्रकरणमा आलमको भन्दा पनि प्रहरीको भयका कारण उजुरी दिएको बयान अदालतमा सरकारी साक्षीले नै बकपत्र गरेका छन्। तैपनि अदालतले तत्कालिन केपी शर्मा ओली नेतृत्वको सरकारको दबाबका आधारमा आलमलाई पूर्पक्षका लागि थुनामा मात्र पठाएन, उनले पटक–पटक धरौटीमा मुद्दा लड्नका लागि दिने निवेदनलाई पनि बेवास्ता गर्न बाध्य पारेको थियो।