इटहरीः इष्ट टुरिजम इभेण्ट म्यानेजमेण्ट एण्ड मिडिया प्रालिद्वारा सञ्चालित प्रदेश पोर्टल अनलाइन सञ्चालक समितिको आजको बैठकले बद्रीप्रसाद पोखरेल (बद्री भिखारी) लाई महाप्रबन्धकमा नियुक्त गर्ने निर्णय गरेको छ।

निजामती सेवामा ३९ वर्ष काम गरी सेवानिवृत्त भएका पोखरेलले आजैदेखि प्रदेश पोर्टलमा महाप्रबन्धकको जिम्मेवारी सम्हालेका हुन् ।

पदभार ग्रहण कार्यक्रममा बोल्दै पोखरेलले आफूलाई प्रदेश पोर्टलले सधैं वर्तमान कर्मचारी बनाएको बताए । ‘म आजैदेखि भूपू कर्मचारी भएको थिएँ । मैले समाजिक सञ्जालमा पनि आज त्यही पोष्ट गरेको थिएँ’, पोखरेलले भने, ‘तर, प्रदेश पोर्टलले महाप्रबन्धकको जिम्मेवारी दिई भूपू हुन नदिएकोमा खुशी छु ।’

आफू कम्पनीको श्रीवृद्धिमा सदैव लागिरहने पोखरेलले बताए ।

उनलाई महाप्रबन्धक पदकाे जिम्मेवारी दिएका कम्पनी अध्यक्ष जीवन पराजुलीले एक असल अभिभावक पाएकाेमा खुसी व्यक्त गरे ।