धनकुटाः धनकुटामा बन्ने नरिवल बिस्कुटको बारेमा थाहा पाएको जोकोही मानिस धनकुटा पुगेर फर्कदा हातमा धनकुटे नरिवल बिस्कुट कासेली लिएर फर्कने गरेका छन् । धनकुटा–४ निवासी स्व. विश्वेश्वरमान श्रेष्ठले उत्पादन शुरु गरेको धनकुटे नरिवल बिस्कुट धनकुटाको पहिचान नै बनेको छ ।
२००८ सालमा देब्रेबासमा चिया दोकान गर्ने विश्वेश्वरमानले ग्राहकको मागका आधारमा भारतीय बिस्कुट ल्याएर माथिल्लो कोप्चेबाट बेच्ने गर्थे । तर, दोकानमा चिया पिउन आउने केही नियमित ग्राहकको सल्लाहमा उनले आफँै बिस्कुट बनाउने अभ्यास शुरु गरे । अन्तत उनले २०११ सालबाट नरिवल सहितको बिस्कुट उत्पादन शुरु गरे ।
२०३० सालमा तत्कालीन जिल्ला पञ्चायत कार्यालयमा उद्योग नै दर्ता गरी उत्पादन शुरु गरियो । आज त्यही बिस्कुट धनकुटाको पहिचान बनेको छ । धनकुटा पुग्ने जोकोही पनि खाजा खान होस वा कोसेली लैजान होस् धनकुटे नरिवल बिस्कुट नै प्रयोग गर्छन् ।
धनकुटामा मात्र नभई धनकुटाभन्दा बाहिरी जिल्लामा समेत यो बिस्कुट निकै लोकप्रिय छ । आफ्ना बुवाले शुरु गरेको पेसालाइ निरन्तरता दिइरहेको छोरा मोहनशंकर श्रेष्ठ बताउँछन् ।
‘बुवाले उत्पादन शुरु गरेको बिस्कुट अहिले निकै लोकप्रिय छ । यो बिस्कुटको ब्राण्ड बनाउनमा बुवाको ठूलो योगदान छ । म यही पेशालाई निरन्तरता दिन्छु’, उनले भने ।
स्थानीय स्तरमै उत्पादित दूध, घिउ र मैदाको प्रयोगबाट बन्ने बिस्कुट काँचो इँटा, माटो र चिमबाट निर्मित भट्टीमा पोलेर तयार गरिन्छ । उद्योगमा निर्मित बिस्कुटभन्दा यो बिस्कुट धेरै स्वादिलो हुने गरेको छ । उद्योगले नरिवल बिस्कुट, खास्ता, कुकिज, फुल केक, पिस केक, कोको बिस्कुट, स्लाइस रोटी, कुकिज, डुनट र पाउरोटीलगायतका बेकरी आइटम उत्पादन गर्दछ ।
यस उद्योगका उत्पादन धनकुटासहित छिमेकी जिल्लासम्म पुग्ने गरेको छ ।
यसको लोकप्रियता बढेसँगै धनकुटामा धेरै बिस्कुट उद्योग थपिएका छन् । हाल धनकुटा नगरक्षेत्रमा मात्र १५ उद्योग दर्ता भई सञ्चालनमा रहेका छन् । जहाँ वार्षिक १ करोड भन्दा बढीको बिस्कुट उत्पादन हुँदा १ सयभन्दा बढी व्यक्तिले प्रत्यक्ष रूपमा रोजगारी पाएको घरेलु तथा साना उद्योग विकास समिति धनकुटाका सूचना अधिकारी दीपेन्द्र अधिकारी बताउँछन् ।
धनकुटे नरिवल बिस्कुटको लोकप्रियताकै कारण माग धान्न निकै गाह्रो हुने गरेको छ । बिस्कुट बनाउने पर्याप्त जनशक्ति नहुँदा उद्योगले मागअनुसार उत्पादन र बजार विस्तार गर्न नसकेको उद्यमी टीका कट्वाल बताउँछन् ।
युवाहरू कामको खोजीमा वैदेशिक रोजगारमा जान थालेपछि कामदार युवा पाउन गाह्रो भएको उनीहरूको भनाइ छ । पछिल्लो समय यो बिस्कुटलाई बजारको माग धान्न निकै गाह्रो छ । बजारमा माग बढेकै कारण धनकुटाको सिको गर्दै पूर्वका अन्य स्थानमा पनि नरिवल बिस्कुट उत्पादन हुने गरेको छ ।
_1720278409.jpg)
